នៅព្រឹកថ្ងៃទី០៥សីហា ឆ្នាំ២០១៤នេះ កម្ពស់ទឹកទន្លេមេគង្គនៅខេត្តក្រចេះបាន ហក់ឡើងដល់២២,៧៤ម៉ែត្រធ្វើឲ្យផ្លូវកណ្តាលបានលិចលង់មួយផ្នែកធំ និង ផ្លូវជុំវិញ ផ្សារក្រុងក្រចេះក៏ត្រូវលិចដែរ ទោះបីមន្ទីរធនធានទឹកប្រឹងប្រែងដាក់ម៉ាស៊ីនបូមទឹកចេញ ក៏មិនអាចដោះស្រាយបានដែរ ។
បច្ចុប្បន្នចំណុចដែលលិចលង់គឺចំណុចផ្លូវកណ្តាល មួយកំណាត់បេនឡានក្រុងក្រចេះ និង ផ្លូវជុំវិញផ្សារក្រចេះផងដែរ ។ ក្រៅពីនោះប្រព័ន្ធ ធារាសាស្ត្រប្រវែងសរុប៦៩គីឡូម៉ែត្រត្រូវបានលិច ហើយសំណង់បង្ហៀរទឹកទំនប់គោក ម្លូរមួយកន្លែងប្រវែង៣០ម៉ែត្រ ក្នុងស្រុកព្រែកប្រសព្វក៏ត្រូវបានបាក់ដាច់ សាលាឃុំមួយ កន្លែង ផ្លូវខេត្តលេខ២៧៩និងផ្លូវលេខ៣៧៧ប្រវែងសរុប១១គីឡូម៉ែត្រនៅក្នុងស្រុក ព្រែកប្រសព្វ និង ស្រុកសំបូរ និង ផ្លូវលំ១៥ខ្សែប្រវែងសរុប៥០គីឡូម៉ែត្រ នៅក្នុងស្រុក ចំនួន០៤គឺស្រុកព្រែកប្រសព្វ ស្រុកចិត្របុរី ស្រុកសំបូរ និង ស្រុកឆ្លូងក៏ត្រូវបានលិចលង់ និងកាត់ផ្តាច់ការធ្វើចរាចរផងដែរ។
ដោយឡែក សន្ទូងស្រូវវស្សាជាង៣.៧០០ហិកតា ដំណាំរួមផ្សំជាង២.០០០ហិកតា ផ្ទះសម្បែង ប្រជាពលរដ្ឋចំនួន៦.១៣១ខ្នង ប្រព័ន្ធគមនាគមន៍ និង ហេដ្ឋារចនាសម្ព័ន្ធជាច្រើនទៀត នៅទូទាំងខេត្តក្រចេះ ត្រូវបានលិចលង់ដោយទឹកជំនន់ទន្លេមេគង្គ នៅដើមខែសីហា ២០១៤នេះ ។
សូមរំឭកផងដែរថា កទន្លេមេគង្គ អាចនឹងបន្តឡើងបន្តិចបន្តួច ក្នុងកម្រិតកម្ពស់មិនលើស២២,៨០នៅថ្ងៃទី០៥ខែសីហា ហើយនឹងចាប់ស្រកបន្តិចវិញនៅព្រឹកថ្ងៃទី០៦សីហា ឆ្នាំ២០១៤ ។ នេះបើតាម ធានមន្ទីរធនធានទឹក និង ឧតុនិយមខេត្តក្រចេះ ហេង រ័ត្នម៉ូនីដា បានឲ្យដឹង ៕
មតិយោបល់