កំពង់ឆ្នាំង៖ សម័យប្រឡងសញ្ញាប័ត្រទុតិយភូមិទូទាំងប្រទេសលើកទី២ នឹងចូលមកដល់នៅថ្ងៃទី១៣ ខែតុលា ឆ្នាំ២០១៤ខាងមុខនេះ តែអ្វីដែលធ្វើអោយលោកនាយកវិទ្យាល័យព្រះបាទសុរាម្រឹត និងលោកវិទ្យាល័យក្រុងកំពង់ឆ្នាំងមានការព្រួយបារម្ភនោះ គឺចំនួនសិស្សដែលបានមកចុះឈ្មោះរៀនត្រៀមប្រឡងលើកទី២ គឺនៅមានចំនួនតិចនៅឡើយ។
លោក អឿ ម៉េងចុង នាយកវិទ្យាល័យព្រះបាទសុរាម្រឹតបានអោយដឹងថា៖ចាប់ពីថ្ងៃទី១០និងទី១១ ខែកញ្ញា ឆ្នាំ២០១៤នេះ លោកនាយកបានផ្សព្វផ្សាយនូវព័ត៌មានតាមវិទ្យុ មួយចំនួននៅក្នុងក្រុងកំពង់ឆ្នាំងទាក់ទងនឹង ការរៀនត្រៀមប្រឡងលើកទី២របស់សិស្ស ដែលបានប្រឡងធ្លាក់សញ្ញាប័ត្រទុតិយភូមិក្នុងឆ្នាំនេះ។ក៍ប៉ុន្តែក្នុងរយៈពេល២ថ្ងៃនេះ មាន
សិស្សចំនួន៤នាក់ តែប៉ុណ្ណោះដែលបានមកចុះឈ្មោះចូលរៀន នៅពេលដែលសិស្សចំនួន ២៧៤នាក់ទៀតមិនឃើញមកចុះឈ្មោះ ចូលរៀននៅឡើយ (សូមបញ្ជាក់ថា៖សិស្សត្រូវ ប្រឡងទាំងអស់មានចំនួន៤៦៧នាក់ ហើយបានប្រឡងជាប់ចំនួន១៨៩នាក់ស្រី១១៥នាក់គឺស្មើនឹង៤០,៤៧% ក្នុងនោះសិស្សម្នាក់បានជាប់និទ្ទេស A គឺយុវសិស្សឈ្មោះ ចាន់ ពិចិត្រ និងសិស្សបានជាប់និទ្ទេស B មានចំនួន៦នាក់ ក្នុងនោះក៏ស្រី១នាក់ផងដែរ)។
លោកបានបន្តថា៖តាមគោលការណ៍ក្រសួងអប់រំ ទី១.តំរូវអោយនាយកវិទ្យាល័យទាំងអស់ធ្វើការផ្សព្វផ្សាយដល់សិស្សដែលបានប្រឡងធ្លាក់ អោយមកចុះឈ្មោះចូលរៀន មុខវិជ្ជាចំនួន៤ឡើងវិញដោយឥតគិតថ្លៃ ក្នុងនោះមានមុខវិជ្ជាគណិតវិទ្យា រូបវិទ្យា គីមីវិទ្យា និងជីវវិទ្យា។ទី២.ធ្វើការផ្សព្វផ្សាយអោយលោកគ្រូអ្នកគ្រូ ដែលគាត់បានបង្ហាត់គួរនៅតាមផ្ទះ គឺមិនតំរូវអោយយកថ្លៃលើសពីថ្លៃធ្លាប់បង្ហាត់គួធម្មតានោះទេ។
ទាក់ទងទៅនឹងរឿងដែលមិនមានសិស្សមកចុះឈ្មោះច្រើន ចូលរៀនក្នុងវគ្គបំប៉ន នេះ លោកនាយកបាននិយាយអោយដឹងថា៖មកពីសិស្សមួយចំនួនបានបង់ថ្លៃសិក្សាលើ មុខវិជ្ជាទាំង៤នេះជាមួយលោកគ្រូអ្នកគ្រូបង្ហាត់គួក្រៅម៉ោងរួចហើយ ចំណែកសិស្សមួយ ចំនួនទៀត អាចមិនទាន់ដឹងនូវព័ត៌មានដែលជាគោលការណ៍របស់ក្រសួងអប់រំ។
ក្នុងរឿងនេះលោក អឿ ម៉េងចុង ក៍បានសំណូមពរដល់អ្នកយកព័ត៌យើង មេត្តាជួយអំពាវនាវបន្ថែមដល់សិស្សគ្រប់វិទ្យាល័យទាំងអស់នៅក្នុងខេត្តកំពង់ឆ្នាំង ជាពិសេសសិស្សក្នុងវិទ្យាល័យសុរាម្រឹតតែម្តង គឺត្រូវតែរូតរះនាំគ្នាទៅចុះឈ្មោះនៅតាមវិទ្យាល័យ របស់ខ្លួន ដើម្បីបានចូលរៀនវគ្គបំប៉ននិងទទួលបានឯកសារលើមុខវិជ្ជាទាំង៤ខាងលើដោយឥតគិត ថ្លៃនិងម្យ៉ាងអាចកាត់បន្ថយថវិការបស់ឪពុកម្តាយ នៅក្នុងការចំណាយទៅរៀនគួជាមួយ គ្រូក្រៅម៉ោងសិក្សា៕
មតិយោបល់