ភ្នំពេញ ៖ រវល់តែនិយាយទូរស័ព្ទពិធីការិនី សុខ សោម៉ាវត្តី បើករថយន្តបុកម៉ូតូមួយគ្រឿងពីក្រោយបណ្តាលឲ្យដួលរងរបួសធ្ងន់ម្នាក់និងស្រាលម្នាក់ កាលពីវេលាម៉ោង១០និង៥០នាទីយប់ថ្ងៃទី១៧ ខែកញ្ញា លើកំណាត់ផ្លូវជាតិលេខ៤ មុខវត្តជម្ពូរវន្ត ភូមិជម្ពូរវន្ត សង្កាត់ចោមចៅ ខណ្ឌពោធិ៍សែនជ័យ ។
ក្នុងហេតុការណ៍នេះដែរគេឃើញ ពិធីការិនីខាងលើ ជាប់និយាយទូរស័ព្ទពេលកំពុងបើកបរ រថយន្តអេស្កាឡែត ពណ៌ស ពាក់ស្លាកលេខ ភ្នំពេញ 2AB 2112 មកចំណុចកើតហេតុខាងលើ ក៏បុកយុវជន ២នាក់ ពីក្រោយតែម្តង ដែលម៉កដឹកប្រេងម៉ាស៊ីនខ្មៅ ។ជនរងគ្រោះខណៈពេលកំពុងតែដោះស្រាយគ្នា ស្រាប់តែអ្នកបើកម៉ូតូបានដួលបែកពពុះមាត់ហើយក្រាច់ វេចមាត់បញ្ឈរភ្នែកស្លឺតែម្តងសាច់ញាតិបម្រុងដឹកតាមរថយន្តយកទៅសង្គ្រោះតែសមត្ថកិច្ចប្រាប់ឲ្យរង់ចាំរថយន្តសង្គ្រោះដឹកយកទៅព្យាបាលនៅមន្ទីរពេទ្យកាល់ម៉ែត្រ ។ បើតាមសម្តីរបស់ពូជនរងគ្រោះបានឲ្យដឹងថា កាលពី៣ឆ្នាំមុន ជនរងគ្រោះធ្លាប់ជិះបុកក្របីចងនៅតាមចិញ្ចើមដួលបែកក្បាលសន្លប់ ប៉ុន្តែចាប់តាំងពីព្យាបាលជាសះស្បើយហើយមិនដែលប្រកាច់ទេ ទើបតែដួលលើកនេះអាចប៉ះចំសរសៃខួរក្បាលទើបបណ្តាលឲ្យសន្លប់បែបនេះ ។
ចំណែកប្តីរបស់ពិធីការិនីបានប្រាប់អ្នកយកព័ត៌មានថា សូមឲ្យអ្នកព័ត៌មានពិនិត្យមើលផង ករណីគ្រោះថ្នាក់ចរាចរណ៍ជារឿងផ្សេង ចំណែកជនរងគ្រោះប្រកាច់ជាជម្ងឺចាស់របស់គាត់ទេ។ ក្រោយពេលកើតហេតុរថយន្តបង្កនិងម៉ូតូសមត្ថកិច្ចយកទៅរក្សាទុកនៅអធិការដ្ឋានខណ្ឌ ពោធិ៍សែនជ័យរង់ចាំធ្វើការដោះស្រាយនៅពេលក្រោយ ៕
មតិយោបល់