ភ្នំពេញ៖ ម្ចាស់មេដាយមាសកីឡាអាស៊ី កីឡាការិនី ស៊ន សៀវម៉ី នឹងត្រូវបានព្រះមហាក្សត្រនៃព្រះរាជាណាចក្រកម្ពុជា ព្រះករុណា សម្ដេចព្រះបាទ នរោត្តម សីហមុនី បានសព្វព្រះរាជហឬទ័យ ហើយបានអនុញ្ញាតវីរនារីឆ្នើមរូបនេះ ចូលគាល់នៅព្រឹកថ្ងៃទី១៨ ខែតុលា ឆ្នាំ២០១៤នេះ ។
អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) លោក វ៉ាត់ ចំរើន បានឲ្យដឹងថា “នៅព្រឹកថ្ងៃទី១៤ តុលានេះ មន្ដ្រីខាងព្រះបរមរាជវាំង បានផ្ញើរលិខិតមកគណៈកម្មាធិការជាតិអូឡាំពិក ដើម្បីបានអនុញ្ញាតកីឲ្យឡាការិនី ស៊ន សៀវម៉ី ចូលគាល់ព្រះមហាក្សត្រផ្ទាល់តែម្ដង នៅថ្ងៃទី១៨ ខែតុលាចុងសប្ដាហ៍នេះ” ។ លោកបានបន្តទៀតថា យោងតាមលិខិតដែលផ្ញើរមក NOCC ការអនុញ្ញាតឲ្យវីរនារី ស៊ន សៀវម៉ី ម្ចាស់ មេដាយមាស ដែលទើបដណ្ដើមបានពីការប្រកួតកីឡា Asian Games លើកទី១៧ នៅទីក្រុង Incheon សាធារណៈរដ្ឋកូរ៉េកន្លងទៅថ្មីៗនេះ គឺជាការសព្វព្រះរាជហឬទ័យផ្ទាល់ពីសំណាក់ព្រះករុណា សម្ដេចព្រះបាទ នរោត្តម សីហមុនី និងសម្ដេចម៉ែ ដែលជាព្រះមហាក្សត្រនៃព្រះរាជាណាចក្រកម្ពុជា ។
បញ្ជាក់ផងដែរថា ប្រជាជនរាប់លាននាក់ បានសម្តែងការអបអរសាទរ ដែល ស៊ន សៀវម៉ី ធ្វើឲ្យភ្លេងជាតិខ្មែរ មានសំលេងឡើងវិញ នៅបរទេស ខណៈបំបែកកំណត់ត្រា ៤៤ ឆ្នាំ កម្ពុជាមិនទទួលបានមេដាយមាសសោះ នោះ ។ ទន្ទឹមជាមួយនឹងជោគជ័យនេះ សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកកម្ពុជា ក៏បានទន្ទឹងរងចាំនាង ដើម្បីជួបសំណេះសំណាល និងប្រគល់រង្វាន់លើកទឹកចិត្តផងដែរ៕
មតិយោបល់