សៀមរាប៖ គ្រូពេទ្យម្នាក់ឈ្មោះ រ៉ុម សាត រស់នៅឃុំខ្វាវ ស្រុកជីក្រែង ខេត្តសៀមរាប ដែលពុំមានសញ្ញាបត្រវិជ្ជាជីវៈជាគ្រូពេទ្យ និងគ្មានការអនុញ្ញាតិច្បាប់ពីស្ថាប័នជំនាញ បច្ចុប្បន្នរស់នៅឃុំខ្វាវ ស្រុកជីក្រែង ខេត្តសៀមរាប ត្រូវបានក្រុមការងាររបស់មន្ទីរសុខាភិបាលខេត្ត ចុះទៅធ្វើការព្រមាន ពិន័យជាប្រាក់មួយលានរៀល និងធ្វើកិច្ចសន្យាឲ្យគ្រូពេទ្យរូបនោះ បញ្ឈប់សកម្មរបស់ខ្លួន ក្នុងការផ្តល់សេវាព្យាបាលជម្ងឺជូនប្រជាជន តទៅទៀត បន្ទាប់ពីមានព្រឹត្តិហេតុទារិកាម្នាក់ឈ្មោះ ថន សុភី អាយុ ១ខួបកន្លះ ត្រូវបាត់បង់ជីវិត បន្ទាប់ពីគ្រូពេទ្យឈ្មោះ រ៉ុម សាត ចាក់ថ្នាំ១ម្ជុលឲ្យទារិកានោះ មុនបញ្ជូនទៅកាន់មណ្ឌលសុខភាព កាលពីថ្ងៃទី១៣ ខែវិច្ឆិកា ឆ្នាំ២០១៤ កន្លងទៅនេះ ។
ក្រុមការងារចុះទៅធ្វើការព្រមានពិន័យ និងធ្វើកិច្ចសន្យាបញ្ឈប់សកម្មភាពរបស់គ្រូពេទ្យគ្មានសញ្ញាបត្រនោះ រួមមានលោកវេជ្ជបណ្ឌិត ពិត ប្រាកដ អនុប្រធានមន្ទីរសុខាភិបាលខេត្តសៀមរាប និងលោកស្រី លី វណ្ណៈ ប្រធានការរិយាល័យឱសថ ព្រមទាំងមានវត្តមានសមត្ថកិច្ចនគរបាលខេត្តនិង មន្ត្រីបុស្តិ៍រដ្ឋបាលនគរបាលឃុំខ្វាវ ផងដែរ ។
បើតាមការស្រាយបំភ្លឺរបស់អ្នកមីង ថន ថុល អាយុ៥៥ឆ្នាំ ជាជីដូនរបស់ទារិការងគ្រោះបានឲ្យដឹងថា នាយប់ទាបភ្លឺថ្ងៃទី១៣ ខែវិច្ឆិកា ចៅរបស់គាត់ប្រកាច់បញ្ឈភ្នែក ហើយគាត់ក៏រកអ្នកជិតខាងឲ្យជួយទូរស័ព្ទហៅគ្រូពេទ្យ រ៉ុម សាត មកជួយពិនិត្យព្យាបាល ។ គ្រូពេទ្យមិនហ៊ានមកទាំងយប់ទេ លុះភ្លឺឡើងទើបមកដល់ ។ ពេលគ្រូពេទ្យឃើញអការៈជម្ងឺទារិកានោះ គ្រូពេទ្យបដិសេធថាមិនហ៊ានមើលទេ ពីព្រោះអាការៈអ្នកជម្ងឺធ្ងន់ធ្ងរណាស់ ហើយបង្ខំឲ្យជីដូនទារិកានោះ នាំយកអ្នកជម្ងឺទៅមណ្ឌលសុខភាព ។ ជីដូនទារិការរងគ្រោះមិនមានប្រាក់ឡើយ គ្រូពេទ្យក៏ជួយឧបត្ថម្ភ២ម៉ឺនរៀល ។ ជីដូនទារិការរងគ្រោះ បានអង្វរឲ្យគ្រូពេទ្យចាក់ថ្នាំ និង ព្យួរសេរ៉ូមឲ្យចៅគាត់ មុននឹងនាំទៅមន្ទីរពេទ្យ ។ គ្រូពេទ្យបានចាក់ថ្នាំឲ្យមួយម្ជុលដើម្បីបន្ថយកំដៅ និងដោតសេរ៉ូមតាមសំណូមពររបស់ជីដូនទារិការរងគ្រោះនោះ តែសេរ៉ូមនោះមិនទាន់បង្ហូរចូលសាច់ទេ ចាំឡើងលើម៉ូតូឌុបសិន ប៉ុន្តែជាអកុស ទារិកានោះ មានអាការកាន់តែខ្លាំង គ្រូពេទ្យក៏ដកម្ជុលសេរ៉ូមចេញវិញ ទារិការនោះក៏លាចាកលោក ចោលជីដូន និងម្តាយម៉េម៉ាយ នៅពេលនោះតែម្តង ។
ចំណែកឯគ្រូពេទ្យគ្មានសញ្ញាបត្រ រ៉ុម សាត ក៏បានសារភាពថា រូបគាត់បានរៀនពេទ្យ តែពុំមានសញ្ញាបត្របញ្ជាក់វិជ្ជាជីវៈពេទ្យនោះទេ ។ ពីមុនរូបគាត់គ្រាន់តែប្រើប្រាស់ចំណេះជំនាញពេទ្យនោះតែក្នុងរង្វង់គ្រួសារផ្ទាល់ខ្លួនតែប៉ុណ្ណោះ តែក្រោយមកដោយសារតែបងប្អូនឃើញដឹងថាគាត់ចេះចាក់ថ្នាំ ព្យាបាលជម្ងឺនោះ បងប្អូនក្នុងភូមិក៏ចេះតែមានការពឹងពាក់តរៀងមក ។ ក្រៅពីនេះ រាល់ចម្លើយរបស់លោក រ៉ុម សាត គឺស្របនឹងការរៀបរាប់របស់លោកស្រី ថន ថុល ជីដូនទារិការរងគ្រោះទាំងអស់ ។
លោកស្រី លី វណ្ណៈ ប្រធានការិយាល័យឱសថ និងជាមន្ត្រីមន្ទីរសុខាភិបាលខេត្តសៀមរាប មានភារកិច្ចចុះផ្សព្វផ្សាយអប់រំ និងធ្វើការព្រមានចំពោះករណីខាងលើ បានឲ្យដឹងថា បើតាមច្បាប់របស់ក្រសួងសុខាភិបាល ស្តីអំពី ការគ្រប់គ្រងសេវាសុខាភិបាលឯកជន បានចែងថា អ្នកប្រព្រឹត្តិល្មើសនឹងច្បាប់នេះ គឺត្រូវទទួលកាតព្រមាន ពិន័យជាប្រាក់ពី ១លាន ដល់ ១០លានរៀល និងត្រូវទទួលទោសជាប់ពន្ធនាគារពី ១ខែ ដល់១ឆ្នាំ ។ លោកស្រីបានបញ្ជាក់ថា ករណីយខាងលើ លោក រ៉ុម សាត គឺបានប្រព្រឹត្តិខុសពីច្បាប់របស់ក្រសួងសុខាភិបាល ដោយលោក រ៉ុម សាត បានធ្វើសកម្មភាពផ្តល់សេវាព្យាបាលជម្ងឺជូនអតិថិជន ដោយខ្លួនពុំមានសញ្ញាបត្រវិជ្ជាជីវៈ និងគ្មានច្បាប់អនុញ្ញាតិទៀតផង ។ លោកស្រីបានបន្តថា ដោយសារតែករណីនេះ ត្រូវបានគ្រួសារជនរងគ្រោះ ( លោកស្រី ថន ថុល ) បាននិយាយថា ការចាក់ថ្នាំរបស់គ្រូពេទ្យគឺជាសំណូមពររបស់គាត់ ហើយលោកស្រី ថន ថុល ក៏បានទទួលស្គាល់ដែរ ការបាត់បង់ជីវិតចៅស្រីរបស់គាត់ គឺបណ្តាលមកពីអាការៈជម្ងឺរបស់ចៅស្រីគាត់ធ្ងន់ធ្ងរពេក ដែលមិនអាចជួយសង្គ្រោះទាន់ពេលវេលាបាន ។
លោកវេជ្ជបណ្ឌិត ពិត ប្រាកដ បានលើកឡើងថា ករណីយវត្តមានគ្រូពេទ្យគ្មានសញ្ញាបត្រវិជ្ជាជីវៈនៅតាមបណ្តាមូលដ្ឋាន កន្លងមក មន្ទីរសុខាភិបាលខេត្តបានធ្វើការព្រមាននិងបញ្ឈប់រាល់សកម្មនោះជាបន្តបន្ទាប់ ក៏ប៉ុន្តែនៅតែមានសេសសល់ និងផ្តល់គ្រោះថ្នាក់ដល់ប្រជាជន ។
លោកបានបញ្ចាក់ដែរថា សមត្ថកិច្ចរបស់ជំនាញសុខាភិបាលក្នុងករណីយខាងលើនេះ គឺការព្រមាន ពិន័យជាប្រាក់ និងធ្វើកិច្ចសន្យាបញ្ឈប់សកម្មភាព ក៏ប៉ុន្តែករណីយបាត់បង់ជីវិតទារិការរងគ្រោះ ដែលត្រូវធ្វើការអង្កេតបន្តយ៉ាងណាទៀតនោះ គឺជាភារកិច្ចរបស់សមត្ថកិច្ចនគរបាល ៕
មតិយោបល់