ភ្នំពេញ៖ យើងដឹងថា កម្រណាស់ដែល បរទេសយកវប្បធម៌ខ្មែរ ទៅប្រារព្ធ ក្នុងប្រទេសរបស់គេ តែផ្ទុយទៅវិញ មានតែយុវវ័យខ្មែរទេ តែងតែភ្លើតភ្លើន នឹងវប្បធម៌បរទេស ដោយយកមកប្រារព្ធ នឹងជូនកាដូគ្នាទៅវិញទៅមក មិនចេះខ្មាស់អៀន សូម្បីតែក្មេងថ្នាក់ទី ៥ និង ទី ៦ ក៏ចេះមានស្នេហា និងចែកជូនកាដូ គ្នាដែរ នាពេលបច្ចុប្បន្ន នេះ ភ្លេចអស់ការសិក្សា និងមិនស្គាល់អ្វីទៅជា ទំនៀមទំលាប់ប្រពៃណីខ្មែរ ។
ជាក់ស្តែង ប៉ុន្មានថ្ងៃមុននេះ គេឃើញរូបភាពនៅលើបណ្តាញសង្គមហ្វេសប៊ុក ក្មេងមួយក្រុម ទំនងជារៀនថ្នាក់ទី ៦ ឬ ទី ៧ បានសរសេរបដា និងជូនកាដូ ដល់មិត្តស្រី រួចបង្ហោះមកកាន់បណ្តាញសង្គមហ្វេសប៊ុក ធ្វើឲ្យអ្នកលេងបណ្តាញសង្គមមួយនេះ ភ្ញាក់ផ្អើលយ៉ាងខ្លាំង ដោយមិននឹកស្មានថា រឿងនេះ វាកើតឡើង ដូច្នោះសោះឡើយ ។
អ្វីដែលកាន់តែច្បាស់ជាងនេះទៅទៀត លើបណ្តាញសង្គមហ្វេសប៊ុកដូចគ្នា នាពេលថ្មីៗនេះ មានវីដេអូឃ្លិបមួយ ដែលបង្ហាញឲ្យឃើញច្បាស់ថា មានសិស្សមួយរូប បានលុតជង្គង់ឲ្យបាច់ផ្កា ជូនមិត្តរួមថ្នាក់ (សង្សារ) និងមានសិស្សជាច្រើនទៀត ហ៊ុំព័ទ្ធមើល សកម្មភាពនេះ និងមានអ្នកថតបង្ហោះចូលបណ្តាញសង្គមហ្វេសប៊ុក ដ៏ស៊ាំញ៉ាំមួយនេះ កំពុងបង្វក់ឲ្យយុវវ័យខ្មែរ ភ្លេចអស់ការសិក្សា និង វប្បធម៌ ។ ក្នុងករណីនេះដែរ បើសិនជា សិស្សសាលាម្នាក់នោះ អាចលុតជង្គង់ជូនផ្កា ឲ្យម្តាយ វាមិនដឹងជាល្អយ៉ាងណានោះទេ ។ នេះបើតាមសម្តី អ្នកលេងបណ្តាញសង្គមហ្វេសប៊ុក ។
យុវសិស្សម្នាក់ សុំមិនបញ្ចេញឈ្មោះ រៀន នៅសាលា ជាស៊ីមសន្ធរមុខ ថ្នាក់ទី ៩ បាននិយាយប្រាប់អ្នកសារព័ត៌មានយើងថា “វីដេអូឃ្លិបនេះ វាមិនល្អនោះទេ មើលទៅឃ្លិបនេះវាអាក្រក់ណាស់ និយាយតាមត្រង់ទៅ ប្រុសម្នាក់នោះពិតជាថោកណាស់ បើជាសកម្មភាពនោះ ធ្វើចំពោះឪពុកម្តាយវិញ តើគាត់ហានដែរអត់ ប្រហែលជាមិនហានទេ មើលទៅនោះ ! ” ។ នៅពេលដែលអ្នកសារព័ត៌យើង សួរថា បុណ្យណូអែលនេះ ប្អូនបានឲ្យកាដូដល់សង្សារអត់ ? យុវសិស្សនេះ បានប្រាប់ថា ខ្ញុំក៏មានស្នេហាដែរ តែមិនដល់ថ្នាក់នោះទេ ហើយក៏មិនភ្លេចការសិក្សាដែរ យ៉ាងច្រើនបំផុត ប៉ាវញ៉ាំស្អីៗ ទៅជាកាស្រេចហើយ មិនដល់ថ្នាក់លុតជង្គង់ឲ្យបាច់ផ្កានោះដែរ ទុកជង្គង់នេះលុតក្រាបសំពះម្តាយវិញ វាល្អជាង ។
បញ្ជាក់ផងដែរថា បុណ្យណូអែល (នៅភាសាអង់គ្លេស បុណ្យ គ្រិស្តម៉ាស) ជាបុណ្យ ទិវាប្រសូតិ របស់ព្រះយេស៊ូគ្រិស។ គ្រឹស្តសាសនិក ជននៅទូទាំងពិភពលោកតែងតែ ប្រារព្ធពិធីបុណ្យនេះ ជារៀងរាល់ឆ្នាំ នៅថ្ងៃទី ២៥ ខែធ្នូ ដែលជាខួបកំណើតរបស់ ព្រះយ៉េស៊ូគ្រឹស្ត។ នៅទីក្រុងប៊ែតឡេហ៊ែម (ប៉ាឡេស្ទីន) ដែលជាទីកន្លែងបង្កើតគម្ពីគ្រឹស្តសាសនា នៃកំនើតព្រះយ៉េស៊ូ គ្រឹស្ត ៕
ទស្សនាឃ្លិបដូចខាងក្រោមនេះ៖
មតិយោបល់