ក្រុមហ៊ុន Nokia បានលក់អាជីវកម្មទូរស័ព្ទចល័តទៅក្រុមហ៊ុន Microsoft ស្របពេលដែលអាជីវកម្មមួយនោះមិនសូវមានដំណើរការល្អ ហើយក្រោយពីការលក់អាជីវកម្មមួយនោះ ត្រូវបានគេមើលឃើញថា ប្រាក់ចំណេញ Nokia ទទួលបានខ្ពស់នៅក្នុងត្រីមាសចុងឆ្នាំ ២០១៤។
នៅថ្ងៃទី២៩ ខែមករា ឆ្នាំ ២០១៥ ម្សិលមិញនេះ ក្រុមហ៊ុនហ្វាំងឡង់ Nokia បានប្រកាសឲ្យដឹងថាប្រាក់ចំណេញនៅក្នុងត្រីមាសចុងឆ្នាំ ២០១៤ ទទួលបាន ៥០៥លានដុល្លារអាមេរិក ប៉ុន្តែមិនបានបង្ហាញប្រាក់ចំណូលសរុបប្រចាំត្រីមាសនោះទេ។ ប្រភពចំណូលរបស់ក្រុមហ៊ុន Nokia ត្រូវបានគេមើលដឹងថា បានមកពីក្រុមហ៊ុន Nokia Networks ដែលជាក្រុមហ៊ុនផ្គត់ផ្គង់គ្រឿងបរិក្ខាទូរគមនាគមន៍ និងកម្មវិធីមើលផែនទី HERE ជាពិសេសគឺថា Nokia ក្រុមហ៊ុនមានប៉ាតង់ពាក់ព័ន្ធនឹងទូរស័ព្ទចល័តច្រើន ដោយបានលក់ទៅក្រុមហ៊ុនផ្សេងៗ ដូច្នេះវាក៏ជាប្រភពប្រាក់ចំណូលមួយផងដែរ។
គួរបញ្ជាក់ផងដែរថា នៅក្នុងអំឡុងឆ្នាំ ២០០០ដល់ ២០០៧ ក្រុមហ៊ុន Nokia ល្បីឈ្មោះយ៉ាងខ្លាំងលើទីផ្សារទូរស័ព្ទចល័ត ប៉ុន្តែក្រោយមក នៅពេល Apple បង្ហាញ iPhone បានធ្វើឲ្យទីផ្សារ Nokia ធ្លាក់ចុះរហូតឈានដល់ការលក់អាជីវកម្មទូរស័ព្ទចល័តឲ្យ Microsoft៕
មតិយោបល់