ក្រុមហ៊ុនលក់ទំនិញតាមអនឡាញយក្សរបស់ចិន Alibaba បានវិនិយោគទុនទឹកប្រាក់ ១៥លានដុល្លារអាមេរិកជាមួយនឹងក្រុមហ៊ុនសន្ដិសុខតាមអនឡាញ​របស់អ៊ីស្រាអែល Jerusalem Venture Partners ដើម្បីពង្រីកទីផ្សារ និងពង្រឹងផ្នែកសន្ដិសុខតាមអនឡាញ។ នេះបើយោងតាមការចុះផ្សាយរបស់ Wall Street Journal ចុះផ្សាយនៅថ្ងៃទី២៣ ខែមីនា។

ពាក់ព័ន្ធនឹងព័ត៌មាននេះ ត្រូវបានក្រុមហ៊ុន Alibaba និង Jerusalem Venture Partners បានធ្វើការបដិសេធមិនធ្វើអត្ថាធិប្បាយអ្វីទាំងអស់ ប៉ុន្តែ​ប្រភព​ដែល​ជិតស្និទ្ធបានអះអាងថា ក្រុមហ៊ុនទាំងពីបានពិភាក្សាគ្នា និងយល់ព្រមចុះកិច្ចព្រមព្រៀង។ កាលពីខែធ្នូ ឆ្នាំ ២០១៤ ក្រុមហ៊ុន Alibaba បាន​វិនិយោគទុន ​ទៅលើក្រុមហ៊ុនអ៊ីស្រាអែល ដែលមានឈ្មោះថា Visualead ជាក្រុមហ៊ុន QR technology។

គួរបញ្ជាក់ផងដែរថា ទំហំពាណិជ្ជកម្មលើវិស័យបច្ចេកវិទ្យារវាងប្រទេសចិន-អ៊ីស្រាអែល ក្នុងឆ្នាំ ២០១៤ មានទឹកប្រាក់​ចំនួន ៣០០លានដុល្លារអាមេរិក ដោយបាន​កើន​ឡើងពី​ ៥០​លានដុល្លារអាមេរិក កាលពីឆ្នាំ ២០១៣ នេះបើយោងតាមរបាយការណ៍របស់ក្រុមប្រឹក្សាសេដ្ឋកិច្ចជាតិរបស់អ៊ីស្រាអែល៕