ក្រុមរដ្ឋឥស្លាមផ្ដាច់ខ្លួន (IS) អាចនឹងបញ្ជូនក្រុមសកម្មប្រយុទ្ធរបស់ពួកគេចូលទៅកាន់តំបន់អឺរ៉ុបតាមរយៈបន្លំខ្លួនជាមួយនឹងជនភៀសខ្លួននៅ​សមុទ្រ​មេឌីទែរ៉ាណេ នេះបើយោងតាមសំដីរបស់លោក Abdul Basit Haroun ទីប្រឹក្សារដ្ឋាភិបាលប្រទេសលីប៊ី បានថ្លែងប្រាប់​សារព័ត៌មាន BBC។

នៅក្នុងកិច្ចសម្ភាសន៍ លោក Abdul Basit Haroun បានថ្លែងឲ្យដឹងថា ពួករត់ពន្ធបានបង្កប់ក្រុមសកម្មជន IS នៅក្នុងទូកជនភៀសខ្លួន ដោយបាន​ក្លែង​ឯកសារ ក្នុងគោលបំណងធ្វើយ៉ាងណាបញ្ជូន​សកម្មជន IS ឲ្យទៅដល់​តំបន់អឺរ៉ុប។ ការប្រមាណនេះត្រូវបានរដ្ឋាភិបាលប្រទេសអ៊ីតាលី និង​អេហ្ស៊ី ធ្លាប់បានក្រើនរំលឹកជាច្រើនដងមកហើយដែរ ប៉ុន្តែក្រុមអ្នកជំនាញបានផ្ដល់យោបល់ថា វាជារឿងពិបាកក្នុងការបែងចែក និងកំណត់​យក​ព័ត៌មាន​ខាងលើ។

លោក Abdul Basit Haroun បានអះអាងដូច្នេះ ដោយសារតែលោកបានជួបជាមួយនឹង​ក្រុមអ្នករត់ពន្ធនៅតំបន់អាហ្វ្រិកខាងជើង ដោយពួកគេបាន​និយាយថា ក្រុម IS ហ៊ានចំណាយលុយលើសលុបសម្រាប់បង្កប់ខ្លួនសកម្មជនរបស់ពួកគេនៅក្នុងក្រុមជនភៀសខ្លួន៕