ទូកទេសចរណ៍មួយគ្រឿង បានក្រឡាប់នៅព្រឹកថ្ងៃអាទិត្យ ទី០៤ ខែមេសា ឆ្នាំ២០២១នេះ នៅបឹង Nam Ngum ប្រហែល៦០គីឡូម៉ែត្រពីរដ្ឋធានីវៀងចន្ទន៍ បណ្ដាលឱ្យមានមនុស្សស្លាប់ ខណ:មនុស្សមួយចំនួនត្រូវបានជួយសង្គ្រោះ។

យោងតាមសារព័ត៌មានស៊ីនហ៊ួរ បានរាយការណ៍ថា លោក Choummaly Sayasone អតីតប្រធានាធិបតីឡាវ ត្រូវបានជួយសង្គ្រោះ និងបញ្ជូនទៅកាន់មន្ទីរពេទ្យ ចំណែក កូនប្រុសរបស់គាត់ ២នាក់ និងកូនស្រី ២នាក់ ត្រូវបានជួយសង្គ្រោះផងដែរ។ សពចំនួន ០៤នាក់ត្រូវបានរកឃើញ និង ៥នាក់ទៀត កំពុងបាត់ខ្លួននៅឡើយ គិតត្រឹមម៉ោង ៤រសៀលថ្ងៃដដែល។

ប្រភពដដែលបានរាយការណ៍បន្តថា ហេតុការណ៍ក្រឡាប់ទូកនេះ បានកើតឡើងម៉ោងប្រហែល ១០:៣០ នាទីព្រឹក អំឡុងពេលដែលកំពុងមានព្យុះភ្លៀង។ ទូកជួយសង្គ្រោះ ត្រូវបានចេញទៅស្វែងរកអ្នកដែលអាចនៅរស់។

សូមជម្រាបថា លោក Sayasone កើតថ្ងៃទី០៦ ខែមីនា ឆ្នាំ១៩៣៦ ជាអតីតប្រធានាធីបតីឡាវ ចន្លោះពីឆ្នាំ២០០៦ ដល់ ២០១៦។ លោកកើតនៅខេត្តអាតាពឺ និងបានចូលរួមជាមួយគណ:បក្សបដិវត្តន៍ប្រជាជនឡាវ នៅឆ្នាំ១៩៩១ និងក្លាយជារដ្ឋមន្ត្រីការពារជាតិឡាវ នៅឆ្នាំ១៩៩១ ដល់ ២០០១៕

ប្រភព៖ clicknews