(Reuters) - កាលពីថ្ងៃច័ន្ទ ប្រទេសអ៊ុយក្រែនបានចោទប្រកាន់វិមានក្រឹមឡាំងចំពោះការបដិសេធសំណើរបស់ខ្លួន សុំឱ្យមានកិច្ចពិភាក្សារវាងប្រធានាធិបតីនៃប្រទេសទាំងពីរជុំវិញការប្រមូលផ្តុំកងទ័ពរុស្ស៊ីនៅក្បែរព្រំដែនរបស់ខ្លួន ប៉ុន្តែទីក្រុងម៉ូស្គូបាននិយាយថា ទាហានរបស់ខ្លួនស្ថិតនៅលើទឹកដីរបស់ខ្លួន ហើយក៏មិនដូចកងទ័ពសហរដ្ឋអាមេរិកដែលមាននៅក្នុងតំបន់នោះឡើយ ។
ទីក្រុងកៀវ និងម៉ូស្គូបានស្តីបន្ទោសគ្នាទៅវិញទៅមកចំពោះ ស្ថានភាពកាន់តែអាក្រក់ខ្លាំងឡើងនៅតំបន់ Donbass ភាគខាងកើត ដែលកងទ័ពអ៊ុយក្រែនបានប្រយុទ្ធជាមួយកងកម្លាំងដែលគាំទ្រដោយរុស្ស៊ីនៅក្នុងជម្លោះមួយ ដោយទីក្រុងកៀវនិយាយថា បានសម្លាប់មនុស្សចំនួន ១៤.០០០ នាក់ចាប់តាំងពីឆ្នាំ២០១៤ មក។
ប្រទេសលោកខាងលិចបានបង្ហាញការព្រួយបារម្ភនៅក្នុងប៉ុន្មានសប្តាហ៍ថ្មីៗនេះ ជុំវិញការប្រមូលផ្តុំកងកម្លាំងដ៏ច្រើនរបស់រុស្ស៊ីនៅក្បែរព្រំដែនភាគខាងកើត នៃប្រទេសអ៊ុយក្រែន និងនៅតំបន់ Crimea ដែលប្រទេសរុស្ស៊ីបានបញ្ចូលជាទឹកដីរបស់ខ្លួនពីទីក្រុងគៀវកាលពីឆ្នាំ២០១៤ មក។
កាលពីថ្ងៃច័ន្ទ ក្រសួងការបរទេសសហរដ្ឋអាមេរិកបាននិយាយថា រដ្ឋមន្ត្រីការបរទេសលោក Antony Blinken និងអគ្គលេខាធិការនៃអង្គការសន្ធិសញ្ញាអាត្លង់ទិកខាងជើង (NATO) លោក Jens Stoltenberg បានពិភាក្សាអំពី “តម្រូវការចាំបាច់ជាបន្ទាន់ចំពោះប្រទេសរុស្ស៊ី ដើម្បីបញ្ឈប់ការចចេសរឹងរួសក្នុងការប្រមូលផ្តុំកម្លាំងយោធា របស់ រុស្ស៊ី”។
រដ្ឋមន្ត្រីការបរទេសមកពីក្រុមប្រទេស G7 រួមមាន សហរដ្ឋអាមេរិក អង់គ្លេស និងបារាំងបានថ្កោលទោសការកើនឡើងនៃចំនួនកងទ័ពរុស្ស៊ីនៅក្បែរព្រំដែនរបស់រុស្សីជាមួយអ៊ុយក្រែន រួមទាំងនៅតំបន់ Crimea ដែលរុស្ស៊ីបញ្ចូលជាទឹកដីរបស់ខ្លួនកាលពីឆ្នាំ២០១៤មក ៕
មតិយោបល់