Post News Media ព័ត៌មានជាតិ Update ៖ មន្ត...

Update ៖ មន្ត្រីយោធាម្នាក់ត្រូវខ្មាន់កាំភ្លើងបាញ់ចំនួន៥គ្រាប់រងរបួសធ្ងន់សង្ស័យជារឿងគុំនុំ

ភ្នំពេញ: មន្ត្រីយោធាម្នាក់បានរងរបួសធ្ងន់ខណ:ខ្មាន់កាំភ្លើងបាញ់ចំនួន៥​គ្រាប់គ្រាដែលគាត់​បានជិះម៉ូតូឌុបចេញពីហាងផឹកស៊ីមួយកន្លែងមានយីហោ ពីរ៉ាមីត ក្នុងគោលបំណង់ត្រឡប់ទៅផ្ទះវិញ ចំណែកខ្មាន់​កាំភ្លើងបានគេចខ្លួនបាត់ស្រមោល ។

ហេតុការណ៍បាញ់ប្រហានេះបានកើតឡើងកាលពីវេលាម៉ោង ១១និង៣០នាទីយប់ថ្ងៃទី ០១ ខែកញ្ញា ឆ្នាំ២០១៦ នៅចំណុចមុខសាលាអន្តរជាតិ ឃីដលែន តាមបណ្តោយផ្លូវ ១៩៦៦ ភូមិពោងពាយ សង្កាត់ភ្នំពេញថ្មី ខណ្ឌសែន​សុខ ។

ជនរងគ្រោះ ត្រូវបានគេស្គាល់ឈ្មោះ លី ហុងសេង (ហៅតាចេក) អាយុ ជាង៥០ឆ្នាំ មុខរបរយោធាស្នាក់នៅភូមិ​​បា​យ៉ាប សង្កាត់ភ្នំពេញថ្មី ខណ្ឌសែនសុខ ត្រូវខ្មាន់កាំភ្លើងបាញ់ឲ្យរបួសត្រូវកាំភ្លើងគ្រាប់ទី១ចំត្រូវកញ្ចឹងក​ធ្លាយ១​គ្រាប់ទៅត្រូវស្មារ បុរសរត់ឌុបបៀមគ្រាប់ជាប់១គ្រាប់ ត្រូវភ្លៅ១គ្រាប់ ត្រូវម្រាមដៃ១គ្រាប់បែកសាច់ ត្រូវទ្រូង១​គ្រាប់ ខ្នង១គ្រាប់។

ចំណែកអ្នករត់ម៉ូតូឌុបដែលរងរបួសត្រូវគ្រាប់កាំភ្លើង មានឈ្មោះ សារ៉េន ភេទប្រុស អាយុ៣២ឆ្នាំ មុខរបរសន្តិ​សុខ ហាងពីរ៉ាមីត ស្នាក់នៅភូមិទំនប់ សង្កាត់ភ្នំពេញថ្មី ខណ្ឌសែនសុខ មានស្រុកកំណើត ភូមិព្រែកតាយ៉ូន ឃុំពងទឹក ស្រុករំដួល ខេត្តស្វាយរៀង។ រងរបួសត្រូវចំ១គ្រាប់ចំស្មាខាងស្តាំដែល​គ្រាប់​នោះ​ធ្លាយពី​ជនរងគ្រោះ​ទី១ (ហៅតាចេក)។

តាមប្រភពជុំវិញកន្លែងកើតហេតុ និងក្រុមអ្នករត់ម៉ូតូឌុបដែលស្គាល់ជនរងគ្រោះ(ហៅតាចេក)​និងជាម៉ូយដែល​តែង​តែ​ឌុបគាត់ ចេញចូលផឹកស៊ីនៅហាងពីរ៉ាមីតនោះ បានប្រាប់ឲ្យដឹងថា នៅមុនពេលកើតហេតុ ជនរងគ្រោះឈ្មោះ លី ហុងសេង ហៅតាចេក បានចេញពីហាងខាងលើ ហើយគាត់បានខលហៅរថយន្តតាក់ស៊ីម៉ែត្រ​ដែលជាម៉ូយ​ប្រចាំរបស់គាត់ឲ្យមកយកទៅផ្ទះ តែតាក់ស៊ីនោះជាប់រវល់មិនបានមក។ ពេលនោះគាត់ក៏ហៅម៉ូតូឌុបដែលជាសន្តិ​សុខ​យាមនៅហាង ឲ្យឌុបគាត់ទៅផ្ទះ បន្ទាប់មកគាត់ក៏ឡើងជិះម៉ូតូចេញទៅ លុះទៅដល់ចំណុចផ្លូវ១៩៦៦ មុខ​សាលា ឃីដលែន ស្រាប់តែមានជនសង្ស័យជាខ្មាន់ភ្លើងបានជិះម៉ូតូមកធ្វើសកម្មភាពបាញ់ប្រហារ​ទៅលើជនរង​គ្រោះ​ចំនួន៥គ្រាប់និងធ្លាយត្រូវអ្នកឌុប១គ្រាប់បណ្តាលឲ្យរងរបួសទាំង២នាក់ធ្ងន់ធ្ងរ​តែម្តងហើយ​ភ្លាមនោះជន​សង្ស័យជាខ្មាន់កាំភ្លើងបានគេចខ្លួនបាត់ស្រមោល។

ពាក់ព័ន្ធនិងករណីបាញ់ប្រហារនេះ លោកវរ:សេនីយ៍ ម៉ក់ ហុង អធិការនគរបាលខណ្ឌសែនសុខ​បានមានប្រសា​ស​ន៍​ថា លោកកំពង់ធ្វើការស្រាវជ្រាវនិងសើបអង្កេតយ៉ាងយកចិត្តទុកដាក់បំផុតហើយលើករណីនេះ លោកបញ្ជាក់ថា​ករណី​នេះគឺ​សង្ស័យជារឿងគុំនុំ។ ប៉ុន្តែលោកមិនទាន់កំណត់បាននូវឡើយថាកាំភ្លើងដែលក្រុមជនសង្ស័យ​បាញ់នោះ​ជាម៉ាកអ្វីនោះទេព្រោះតាមការមើលសំបកគ្រាប់គឺអាចប្រើបានច្រើនម៉ាក។លោកបន្តទៀតថានៅកន្លែងកើតហេតុ​សមត្ថកិច្ចរកឃើញសំបកគ្រាប់ចំនួន៤គ្រាប់និងបំណែកក្បាលគ្រាប់ជាច្រើន។

ក្រោយមកបុរសរត់ឌុបបានជិះម៉ូតូទៅពេទ្យដោយខ្លួនឯងមិនបានដឹកជនរងគ្រោះទៅជាមួយទេ។នោះហើយករណី​នេះ​ក៏​ផ្អើលដល់ក្រុមរត់ម៉ូតូឌុបនៅម្តុំហាង អលស្តារ មកមើលហើយរួចបានឌុបតាចេកទៅពេទ្យតែ តាចេក បានអោ​យ​ឌុបទៅផ្ទះគាត់វិញ ម៉ូតូឌុបក៏ឌុបទៅគោលដៅ២៤ម៉ោងរបស់សមត្ថកិច្ចខណ្ឌសែនសុខឲ្យជួយអន្តរាគមន៍។

ដោយឡែកតាមសម្តីរបស់បុរសម្នាក់ឈ្មោះ ស៊ឹម អូន អាយុ៤២ មុខរបរនគរបាល ស្នាក់នៅខណ្ឌទួលគោក ដែល​ជាអ្នកស្គាល់ជនរងគ្រោះ តាចេក ព្រោះជាម៉ូយប្រចាំហាងដូចគ្នា ធ្លាប់ផឹកស៊ីជល់កែវជាមួយគ្នាញឹកញាប់ បានប្រាប់​ឲ្យដឹងថានៅមិនពេលកើតហេតុ គាត់នៅផឹកស៊ីនៅហាង អលស្តារ នៅតាមផ្លូវកើតហេតុ ១៩៦៦ ចង្ងាយពី​កន្លែង​កើតហេតុ ជា៥០០មែត្រ ក៏មានសន្តិសុខហាងមកប្រាប់គាតថា មានគេរកគាត់ ឲ្យទៅមើលនៅខាងមុខព្រោះ​មាន​ករណីគេបាញ់មនុស្ស បន្ទាប់មកគាត់បានជិះរថយន្តរបស់គាត់ម៉ាកកូរ៉ូឡា ពណ៌ទឹកមាស ពាក់ស្លាកលេខ ភ្នំពេញ 2V-6143 ទៅមើលតែពេលទៅដល់មិនឃើញអ្វីនោះទេ លុះក្រោយមកមួយសន្ទុះ គាត់ក៏ត្រឡប់មកដល់​ហាងពីរ៉ា​មីត ខណ:នោះក៏មានឈ្មោះឡា ជាម៊ូយតាក់ស៊ីរបស់ ជនរងគ្រោះទូរស័ព្ទមកប្រាប់ថា តាចេកត្រូវគេបាញ់ ឥឡូវ​ត្រូវ​បញ្ជូនទៅសង្គ្រោះបន្ទាប់នៅមន្ទីរពេទ្យកាល់ម៉ែត្រហើយ ហើយតាចេកបានផ្តាំថា ឲ្យសមត្ថ​កិច្ចនៅ​យាមមើល​អ្នកផ្ទះគាត់ផង នេះជាបណ្តាំរបស់ជនរងគ្រោះតាចេក។ ស្របពេលដែលឈ្មោះ ស៊ឹម អូនមកដល់ហាងពីរ៉ាមីត សម​ត្ថកិច្ចបានមកដល់ព្រោងព្រាត និងបានសួរនាំ ក៏បុរសឈ្មោះ ស៊ឹម អូន ប្រាប់ថាស្គាល់ តាចេក ទើបសមត្ថកិច្ច​សុំការបំភ្លឺពីគាត់។ ក្រោយពេលកើតហេតុ និងក្រោយពេលសាកសួរបំភ្លឺពីបុរស ស៊ឹម អូន ដឹងពីសមាសភាព​របស់​ឈ្មោះ ស៊ឹម អូន និងដឹងថា ស៊ឹមអូន មានកាំភ្លើងប្រើប្រាស់ ទើបលោកអធិការខណ្ឌសែនសុខ និងលោកមេប៉ុស្តិ៍​ភ្នំពេញថ្មី សុំពិនិត្យមើលកាំភ្លើងរបស់ ស៊ឹម អូន ម៉ាក រ៉ូឡូ ទើបកំលាំងសមត្ថកិច្ចសុំឃាត់ឈ្មោះ ស៊ឹម អូន ទៅសា​ក​សួរបន្តនៅអធិការដ្ឋាននគរបាលខណ្ឌសែនសុខបន្ត តែក្រោយមក មិនមានអ្វីជាតម្រុយនិងមិនមានទាក់ទង​ហេតុ​ការណ៍នេះ ក៏បានឲ្យ ស៊ឹម អូន ត្រឡប់ទៅវិញ ៕

បាញ់នៅខណ្ឌសែនសុខ

បាញ់នៅខណ្ឌសែនសុខ_01

បាញ់នៅខណ្ឌសែនសុខ_02

បាញ់នៅខណ្ឌសែនសុខ_03

បាញ់នៅខណ្ឌសែនសុខ_04