តាមការព្យាករដំបូងរបស់ការិយាល័យស្ថិតិអឺរ៉ុប ផលិតសរុបក្នុងស្រុកនៃ ១៩ប្រទេសចាយប្រាក់អឺរ៉ូបានធ្លាក់ចុះ ០,៦% នៅត្រីមាសទី១ ឆ្នាំ ២០២១ បន្ទាប់ពីបានធ្លាក់ចុះ ០,៧% នៅត្រីមាសទី៤ ឆ្នាំ ២០២០។ តាមលក្ខណ:បច្ចេកទេស ការធ្លាក់ចុះចំនួន ២ត្រីមាសជាប់គ្នានេះមានន័យថា តំបន់អឺរ៉ូមានសេដ្ឋកិច្ចដើរថយក្រោយ។ តែការធ្លាក់ចុះនេះមិនសូវធ្ងន់ធ្ងរដូចការធ្លាក់ចុះនៅត្រីមាសទី២ ឆ្នាំ ២០២០ ដែលមានដល់ទៅ ១១,៦% និងត្រីមាសទី៣ ឆ្នាំ ២០២០ ដែលមានដល់ទៅ ១២,៥%។ ក្នុងចំណោមប្រទេសចាយប្រាក់អឺរ៉ូដែលគេមានទិន្នន័យ ព័រទុយហ្កាល់ជាប្រទេសដែលរងគ្រោះខ្លាំងជាងគេដោយមានកំណើនសេដ្ឋកិច្ចអវិជ្ជមាន ៣,៣% ក្រោមសូន្យនៅចន្លោះខែមករា និងមីនាឆ្នាំ ២០២១។
អាល្លឺម៉ង់ដែលជាប្រទេសសេដ្ឋកិច្ចទី១ របស់អឺរ៉ុបក៏គេចមិនរួចដែរដោយមានកំណើនសេដ្ឋកិច្ចអវិជ្ជមាន ១,៧% ក្រោមសូន្យ អេស្ប៉ាញមាន ០,៥% ក្រោមសូន្យ និងអ៊ីតាលីមាន ០,៤% ក្រោមសូន្យ។ ដោយឡែកនៅបារាំង កំណើនតម្រូវការក្នុងស្រុកបានធ្វើឲ្យប្រទេសទទួលបានកំណើនសេដ្ឋកិច្ចវិជ្ជមានចំនួន ០,៤%។ លោក Andrew Kenningham អ្នកវិភាគម្នាក់បានមើលឃើញថា អត្រាសេដ្ឋកិច្ចក្នុងតំបន់អឺរ៉ូសព្វថ្ងៃបន្តមានកម្រិតទាបជាងកម្រិតមុនផ្ទុះវិបត្តិកូវីដ១៩ ចំនួន ៥,៥%។ ចំណែកអាមេរិក និងចិនហាក់កំពុងរំកិលរកឃើញឡើងវិញនូវកម្រិតកំណើនសេដ្ឋកិច្ចដូចនៅមុនផ្ទុះវិបត្តិកូវីដ១៩។
ជាក់ស្តែងចន្លោះខែមករា និងមីនាឆ្នាំ ២០២១ អាមេរិកមានកំណើនសេដ្ឋកិច្ចខ្ពស់ខ្លាំងមិនធ្លាប់មានគិតតាំងពីឆ្នាំ ២០០៣។ ចំណែកចិនបានស្គាល់អត្រាផលិផលសរុបក្នុងស្រុកហក់ឡើងដល់ទៅ ១៨,៣% ក្នុងរយ:ពេលដូចគ្នានេះ។ មានហេតុផលសំខាន់ចំនួន ២ ដែលបានធ្វើឲ្យសេដ្ឋកិច្ចតំបន់អឺរ៉ូអូសជើងធៀបនឹងអាមេរិក និងចិន ទី១ ភាពយឺតយ៉ាវក្នុងការចាក់វ៉ាក់សាំងដែលតម្រូវឲ្យបិទខ្ទប់ប្រទេសដើម្បីទប់ស្កាត់នឹងការឆ្លងកូវីដ១៩ និងទី២ ភាពយឺតយ៉ាវក្នុងការពន្លឿនផែនការផ្តល់សន្ទុះដែលជាប្រាក់កម្ចីរួមសម្រេចបាននារដូចក្តៅឆ្នាំ ២០២០។
យ៉ាងណាក៏ដោយ អ្នកវិភាគលោក Andrew Kenningham បានមើលឃើញថា សេដ្ឋកិច្ចអឺរ៉ុបនឹងផ្តើមស្គាល់ស្ថានភាពប្រសើរឡើងនៅដំណាច់ត្រីមាសទី២ ខាងមុខ ព្រោះការបង្កើនយុទ្ធនាការចាក់វ៉ាក់សាំងនឹងអនុញ្ញាតឲ្យរដ្ឋាភិបាលលើកចេញវិញនូវវិធានការបិទខ្ទប់៕
មតិយោបល់