(Reuter) កាលពីថ្ងៃអង្គារ៍ប្រធានាធិបតីអាមេរិកលោក Joe Biden បាននិយាយថា លោកចង់រៀបចំកិច្ចប្រជុំកំពូលមួយជាមួយប្រធានាធិបតីរុស្ស៊ីលោក Vladimir Putin ក្នុងដំណើរទស្សនកិច្ច ទៅកាន់អឺរ៉ុបនៅខែមិថុនា។
ប្រធានាធិបតីអាមេរិកលោក Biden បានប្រាប់អ្នកសារព័ត៌មានបន្ទាប់ពីមានការថ្លែងសុន្ទរកថាពីការឆ្លើយតបរបស់សហរដ្ឋអាមេរិកចំពោះវីរុសកូរ៉ូណាថា “កិច្ចប្រជុំនេះគឺជាក្តីសង្ឃឹម និងការរំពឹងទុករបស់ខ្ញុំ។ យើងកំពុងធ្វើការដើម្បីកិច្ចប្រជុំនេះ” ។
ប្រធានាធិបតីសហរដ្ឋអាមេរិកលោក Biden គ្រោងនឹងចូលរួមកិច្ចប្រជុំកំពូលរបស់ក្រុមប្រទេសទាំងប្រាំពីរនៅទីក្រុង Cornwall ប្រទេសអង់គ្លេសដែលគ្រោងធ្វើនៅថ្ងៃទី ១១-១៣ ខែមិថុនា បន្ទាប់មកធ្វើដំណើរទៅកាន់ទីក្រុង Brussels ក្នុងជំនួបជាមួយមេដឹកនាំសហភាពអឺរ៉ុប និងចូលរួមកិច្ចប្រជុំកំពូលណាតូនៅថ្ងៃទី ១៤ ខែមិថុនា។
មន្ត្រីសហរដ្ឋអាមេរិកបានធ្វើការជាមួយសមភាគីរុស្ស៊ីស្តីពីការរៀបចំកិច្ចប្រជុំកំពូលរវាងប្រធានាធិបតី សហរដ្ឋអាមេរិកលោក Biden និងប្រធានាធិបតី រុស្សីលោក Putin នៅក្នុងប្រទេសទីបីក្នុងអំឡុង ដំណើរទស្សនកិច្ចក្រៅប្រទេសជាលើកដំបូងរបស់ប្រធានាធិបតីសហរដ្ឋអាមេរិកលោក Biden៕
មតិយោបល់