(Reuter) ៖ នគរបាលអេស៉្បាញបាននិយាយថាពួកគេបានបណ្តេញអ្នកជួបជុំពិធីជប់លៀងចំនួន ៩,០០០ នាក់ចេញពីផ្លូវកណ្តាលទីក្រុង Barcelona និងឆ្នេរក្បែរនោះកាលពីថ្ងៃអាទិត្យដើម្បីការពារកុំឲ្យមានមនុស្សច្រើនកកកុញនៅថ្ងៃចុងសប្តាហ៍ដំបូងបន្ទាប់ពីការរឹតត្បិតការពារមេរោគ COVID-19 ត្រូវបានដកចេញ។
នគរបាលនិយាយថាមនុស្សជាច្រើនបានចូលរួមនៅក្នុងពិធីជប់លៀងដ៏ធំដែលត្រូវបានគេស្គាល់ថាជាកម្មវិធី“ botellones” ។
រដ្ឋមន្រ្តីក្រសួងវប្បធម៌លោក Jose Manuel Rodríguez Uribes ថ្លែងនៅក្នុងព្រឹត្តិការណ៍មួយនៅទីក្រុងម៉ាឌ្រីដបានជំរុញឱ្យយុវជនបន្តអនុវត្តតាមច្បាប់ដែលតំរូវរក្សាគម្លាតសង្គម។
លោក Rodríguez Uribes បានមានប្រសាសន៍ថា“ ខ្ញុំដឹងថាវាមានការលំបាកក្នុងការរស់នៅជាមួយនឹងការរឹតត្បិតជាច្រើនហើយចាំបាច់ត្រូវការចេញទៅក្រៅ ប៉ុន្តែខ្ញុំស្នើសុំឱ្យអ្នកមានការប្រុងប្រយ័ត្ន និងបន្តគោរពវិធានការរក្សាសុវត្ថិភាព” ។
រដ្ឋាភិបាលបានដកការដាក់ប្រទេសក្នុងស្ថានភាពអាសន្នរយ:ពេល ៦ ខែនៅថ្ងៃទី ៩ ឧសភានៅពាក់កណ្តាលអធ្រាត្រ ដូច្នេះនេះជាឱកាសដំបូងសម្រាប់អ្នកចូលរួមពិធីជប់លៀងចុងសប្តាហ៍។
វានៅតែមានការរឹតបន្តឹងមួយចំនួន។ នៅក្នុងទីក្រុង Barcelona នៃតំបន់ Catalonia បារ និងភោជនីយដ្ឋាន បើកពីម៉ោង ៧ ព្រឹករហូតដល់ម៉ោង ១១ យប់។ ហើយក្នុងតុមួយមានមនុស្សអង្គុយច្រើនបំផុតបួននាក់។
ការធ្វើដំណើរក្នុងប្រទេសអេស្ប៉ាញត្រូវបានអនុញ្ញាត ហើយប្រជាជនជាច្រើនបានឈប់សម្រាករយ:ពេលខ្លីនៅចុងសប្តាហ៍។
អាជ្ញាធរចរាចរណ៍បានរាយការណ៍ថា រថយន្តដែលចាកចេញពីទីក្រុងសំខាន់ៗកាលពីថ្ងៃសុក្រមានការកើនឡើងចំនួន ៤២% នៅបើប្រៀបធៀបនឹងរយ:ពេលដូចគ្នាកាលពីសប្តាហ៍មុន។ ប្រធានទេសចរណ៍នៅរមណីយដ្ឋានភាគអាគ្នេយ៍ Benidorm បាននិយាយថាការកក់សណ្ឋាគារមាន ៦០ ភាគរយ។
ប្រទេសអេស្ប៉ាញស្ថិតក្នុងចំណោមប្រទេសដែលរងគ្រោះខ្លាំងជាងគេនៅអ៊ឺរ៉ុបដោយមានអ្នកស្លាប់ដោយសារមេរោគ corona មានចំនួន ៧៩,៣៣៩ នាក់និង ៣.៦ លាននាក់បានឆ្លង នេះបើយោងតាមទិន្នន័យរបស់ក្រសួងសុខាភិបាលកាលពីថ្ងៃសុក្រ។ ប៉ុន្តែអត្រាឆ្លងបានធ្លាក់ចុះ ហើយជិតមួយភាគបីនៃប្រជាជនបានទទួលវ៉ាក់សាំងបង្ការយ៉ាងហោចណាស់មួយដង។
មតិយោបល់