កាលពីថ្ងៃចន្ទ ក្រសួងការបរទេសកូរ៉េខាងត្បូងបានបដិសេធចំពោះរបាយការណ៍ព័ត៌មានមួយដែលរដ្ឋាភិបាលបានសន្យាថានឹងធ្វើឱ្យប្រសើរឡើងនូវទំនាក់ទំនងជាមួយប្រទេសជប៉ុនជាថ្នូរនឹងសហរដ្ឋអាមេរិកដែលបានប្តេជ្ញាចិត្តទៅលើកិច្ចព្រមព្រៀងកំពូលក្នុងអាណត្តិរបស់លោក ត្រាំ ជាមួយប្រទេសកូរ៉េខាងជើង។
កាសែតពាណិជ្ជកម្ម Maeil បានរាយការណ៍ថា មន្ត្រីកូរ៉េខាងត្បូងបានព្យាយាមបញ្ចុះបញ្ចូលរដ្ឋបាលសហរដ្ឋអាមេរិករបស់លោកប្រធានាធិបតី ចូ បៃដិន ឱ្យទទួលមរតកនៃកិច្ចព្រមព្រៀងឆ្នាំ ២០១៨ ដែលពេលនោះអតីតប្រធានាធិបតីសហរដ្ឋអាមេរិក លោក ដូណាល់ ត្រាំ បានចុះហត្ថលេខាជាមួយមេដឹកនាំកូរ៉េខាងជើងលោក គីម ជុងអ៊ុន បន្ទាប់ពីជំនួបកំពូលលើកដំបូងរវាងប្រទេសទាំងពីរ។
មន្ដ្រីសហរដ្ឋអាមេរិកបានទាមទារជាថ្នូរឱ្យទីក្រុងសេអ៊ូលធ្វើឱ្យប្រសើរឡើងនូវទំនាក់ទំនងជាមួយប្រទេសជប៉ុន។
ក្រសួងនេះបាននិយាយនៅក្នុងសារជាអក្សរទៅកាន់អ្នកសារព័ត៌មានថា «របាយការណ៍នេះមិនត្រឹមតែជាព័ត៌មានមិនពិតប៉ុណ្ណោះទេ ប៉ុន្តែវាគឺជារបាយការណ៍ព្យាបាទផងដែរ»។
ក្រសួងនេះបាននិយាយបន្ថែមថា «កូរ៉េខាងត្បូង និងសហរដ្ឋអាមេរិកបានពិគ្រោះយោបល់គ្នាយ៉ាងជិតស្និទ្ធទៅលើដំណើរការទាំងមូលនៃការត្រួតពិនិត្យគោលនយោបាយរបស់សហរដ្ឋអាមេរិកលើប្រទេសកូរ៉េខាងជើង ហើយយើងមិនបានភ្ជាប់ ឬពិនិត្យមើលបញ្ហាការទូតណាមួយផ្សេងទៀតជាមួយនឹងគោលនយោបាយរបស់កូរ៉េខាងជើងនៅក្នុងដំណើរការនេះទេ»៕
មតិយោបល់