អ្វីដែលពលរដ្ឋបារាំងបានរកឃើញថ្មីសម្រាប់ជីវិតរស់នៅប្រចាំថ្ងៃនៅក្នុងការបើកប្រទេសនាដំណាក់ការទី២ ក្នុងថ្ងៃទី១៩ ឧសភា គឺសេរីភាពនៃការរស់នៅ ដើរហើរ នោះបើទោះបីជាសេរីភាពមួយនេះនៅមិនទាន់ពេញលេញក៏ដោយ។ គួររម្លឹកថា តាំងពីថ្ងៃផ្ទុះជំងឺកូវីដ១៩ ជាង ១ឆ្នាំកន្លងមក បារាំងបានបិទ បើកប្រទេសចំនួន ៣ដង។
តែវិធានការបើកប្រទេសលើកនេះត្រូវបានប្រធានាធិបតីលោកម៉ាក្រុងធ្វើឡើងសន្សឹមៗដោយចែកចេញជា ៤ដំណាក់ការដែលបានចាប់ផ្តើមលើកទី១ ក្នុងថ្ងៃទី៣ ឧសភា លើកទី២ ក្នុងថ្ងៃទី១៩ ឧសភានេះ និងលើកទី៣ និងលើកទី៤ នៅថ្ងៃទី៩ និងថ្ងៃទី៣០ មិថុនាខាងមុខ។ ចាប់ពីថ្ងៃពុធ ទី១៩ ឧសភានេះទៅ បំរាមគោចរត្រូវរំកិលបន្ថែម ២ម៉ោងទៀតដោយចាប់ផ្តើមពីម៉ោង ៩យប់ដល់ម៉ោង ៦ភ្លឺ។
រោងកុន រោងល្ខោន សារ:មន្ទីរ បណ្ណាល័យ កាស៊ីណូ សួនសត្វនៅកណ្តាលវាល និងកន្លែងរៀបចំពិធីកម្សាន្តនៅកណ្តាលវាលអាចបើកទ្វារទទួលភ្ញៀវជាថ្មីចាប់ពីថ្ងៃទី១៩ ឧសភានេះទៅ។ តែនៅមិនទាន់អាចទទួលភ្ញៀវបាន១០០% នៅឡើយទេ។ ឧទាហរណ៍ រោងកុន រោងល្ខោនអាចទទួលបានត្រឹម ៣៥% កាស៊ីណូក៏អាចទទួលបានត្រឹមតែ ៣៥% ឬមួយក៏ ៥០% សម្រាប់សួនសត្វនៅកណ្តាលវាល និងសម្រាប់ពិធីកម្សាន្តនៅកណ្តាលវាល។ ចំណែកនៅបណ្ណាគារត្រូវទុកកៅអីមួយឲ្យនៅទំនេរសម្រាប់កៅអីពីរ។ បន្ទាប់មក ហាងលក់ទំនិញមិនចាំបាច់ដែលបានបិទទ្វារតាំងពីដំណាច់ខែមីនាក៏ត្រូវបានអនុញ្ញាតឲ្យបើកទ្វារឡើងវិញចាប់ពីថ្ងៃទី១៩ ឧសភានេះទៅ។
តែអ្នកដែលហាក់បានធូរទ្រូងខ្លាំងជាងគេ គឺម្ចាស់ភោជនីយដ្ឋាន និងហាងកាហ្វេដែលបានបិទទ្វារតាំងពីជាង ៦ខែមកហើយ។ នៅក្នុងការបើកប្រទេសដំណាក់ការទី២ ចាប់ពីថ្ងៃទី១៩ ឧសភានេះ ភោជនីយដ្ឋាន និងហាងកាហ្វេអាចបើកទ្វារទទួលភ្ញៀវបានតែនៅខាងក្រៅ ហើយតុមួយអាចដាក់ភ្ញៀវបានច្រើនបំផុតត្រឹម ៦នាក់។ ការទទួលភ្ញៀវនៅខាងក្នុងត្រូវរង់ចាំនៅដល់ថ្ងៃទី៩ មិថុនា។ ដើម្បីចូលរួមសាទរពីការមានសេរីភាពឡើងវិញតាមរយ:ការបើកប្រទេសក្នុងដំណាក់ការទី២ ពេលនេះ ប្រធានាធិបតីលោកម៉ាក្រុង និងនាយករដ្ឋមន្រ្តីលោកកាស្ទិចបានអង្គុយពិសារកាហ្វេនៅខាងក្រៅភោជនីយដ្ឋានមួយក្នុងក្រុងប៉ារីសក្បែរវិមានប្រធានាធិបតីអេលីហ្សេ។
មតិយោបល់