មេបញ្ជាការជាន់ខ្ពស់មួយរូបបាននិយាយថា សហរដ្ឋអាមេរិកកំពុងពន្លឿនផែនការដែលកំពុងបង្កើតឡើង ដើម្បីជម្លៀសជនជាតិអាហ្វហ្គានីស្ថានដែលបានធ្វើការឲ្យយោធាអាមេរិក មុនការដកកងទ័ពនៅខែតុលា។ ប្រធានក្រុមសេនាធិការចម្រុះលោកឧត្ដមសេនីយ៍ Mark Milley បាននិយាយថា អ្នកបកប្រែភាសា និងបុគ្គលិកមួយចំនួនទៀតអាចជាគោលដៅរបស់ក្រុមសកម្មប្រយុទ្ធតាលីបង់។
ជនជាតិអាហ្វហ្គានីស្ថានចំនួន ១៨,០០០នាក់បានដាក់ឯកសារស្នើសុំទិដ្ឋាការពីសហរដ្ឋអាមេរិក ដើម្បីធ្វើអន្តោប្រវេសន៍ទៅកាន់សហរដ្ឋអាមេរិក ក្រោមកម្មវិធីពិសេសមួយ។ ប៉ុន្តែផែនការនេះត្រូវបានលើកពេល ដែលធ្វើឲ្យអ្នកដាក់សំណើរួចរាល់ត្រូវរង់ចាំរយ:ពេលជាច្រើនឆ្នាំ។ មេបញ្ជាការជាន់ខ្ពស់រូបនេះបាននិយាយថា ការងារសំខាន់បំផុតនោះគឺត្រូវធានាថា យើងនៅតែមានភាពស្មោះត្រង់ជាមួយពួកគេ ហើយយើងធ្វើអ្វីដែលចាំបាច់ដើម្បីធានាពីការការពាររបស់ពួកគេ ប្រសិនបើចាំបាច់ត្រូវនាំពួកគេចេញពីប្រទេសនេះ បើសិននោះជាអ្វីដែលពួកគេចង់បាន។
កាលពីខែមេសាកន្លងទៅ លោកប្រធានាធិបតី Joe Biden បាននិយាយថា ទាហានអាមេរិកនឹងត្រូវដកចេញនៅក្នុងខែតុលា បន្ទាប់ពីការបំពេញការងាររយ:ពេល ២០ឆ្នាំនៅអាហ្វហ្គានីស្ថាន។ លោកថា នេះជាពេលវេលាត្រូវបញ្ចប់សង្គ្រាមដ៏រាំរៃ យូរអង្វែងបំផុតរបស់សហរដ្ឋអាមេរិកហើយ។
គួរឲ្យដឹងថា មានទាហានអាមេរិកយ៉ាងហោចណាស់ ២,៥០០នាក់នៅក្នុងប្រទេសនេះ ជាផ្នែកបេសកកម្មរបស់អង្គការណាតូនៅប្រទេសអាហ្វហ្គានីស្ថាន ដែលមានទាហានសរុបចំនួន ៩,៦០០នាក់៕
មតិយោបល់