តាមរយ:សេចក្តីថ្លែងការណ៍ នាយករដ្ឋមន្ត្រីផុតអាណត្តិ ក្លូត ហ្សូហ្សេ Claude Joseph បានប្រកាសជូនដំណឹងអំពីការធ្វើឃាតប្រធានាធិបតីហៃទី លោក ហ្សូវឺណែល ម៉ូអ៊ីស៍ Jovenel Moïse។ នៅវេលាម៉ោង១ទៀបភ្លឺព្រឹកថ្ងៃពុធទី ៧កក្កដា ក្រុមប្រដាប់អាវុធមួយក្រុមបានចូលទៅសម្លាប់ប្រធានាធិបតី ដល់ក្នុងបន្ទប់គេង នៃគេហដ្ឋានផ្ទាល់របស់លោកតែម្តង ដែលស្ថិតនៅជាយរដ្ឋធានី ព័រអូប្រាំង។
ចំណែកលោកជំទាវទីមួយ ជាភរិយារបស់លោកប្រធានាធិបតី ក៏ត្រូវរងរបួសជាទម្ងន់ និងត្រូវបានបញ្ជូនទៅដល់មន្ទីរពេទ្យក្រុងមីអាមី សហរដ្ឋអាមេរិក។
លោកនាយករដ្ឋមន្ត្រីបានអះអាង នៅក្នុងសេចក្តីថ្លែងការណ៍នេះដដែលថា ក្រុមជើងឆើត បួននាក់ត្រូវបានសម្លាប់ និងចាប់ខ្លួនបានពីរនាក់។ ចំណែកប៉ូលិសដែលពួកកម្មង់ដូចាប់បានជាចំណាប់ថ្នូរ ក៏ត្រូវបានដោះលែងមកវិញដែរ។ ជាងនេះទៅទៀត កងកម្មង់ដូទាំងនោះ ខ្លះនិយាយភាសាអង់គ្លេស ខ្លះនិយាយភាសាអេស្ប៉ាញ។
២៤ម៉ោងក្រោយការកើតហេតុ ពុំមានក្រុមឬចលនាណាចេញមុខមកអះអាងអំពីសកម្មភាពរបស់ខ្លួនឡើយ។
ក៏ប៉ុន្តែហេតុការណ៍នេះមានបង្កប់នូវចំណុចគួរឱ្យសង្ស័យច្រើនទៀត ដូចជា ការធ្វើឃាតនេះកើតឡើងក្រោយការតែងតាំងនាយករដ្ឋមន្ត្រីថ្មី។ គួរឱ្យឆ្ងល់ទៀត កងកម្មង់ដូអាចចូលដល់ក្នុងបន្ទប់ប្រធានាធិបតី ដោយស្រួល ដោយគ្មានកងអង្គប្រធានាធិបតីណាម្នាក់ត្រូវរបួសឬស្លាប់ទេ ហើយចេញទៅវិញដោយសម្រួលទៀត មុននឹងត្រូវបានកម្ចាត់តាមក្រោយ។
មតិយោបល់