(កំពង់ឆ្នាំង)៖ យោងតាម ការចេញផ្សាយរបស់បណ្តាញព័ត៌មាន Fresh News ដែលបានដកស្រង់ប្រសាសន៍របស់ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក មជ្ឈមណ្ឌលសកម្មភាពកម្ចាត់មីនកម្ពុជា (CMAC) នៅថ្ងៃទី០២ ខែសីហា ឆ្នាំ២០២១នេះក្នុងពេលដែល ឯកឧត្តម អញ្ជើញចុះមកពិនិត្យ និងវាយតម្លៃការងារសិក្សា ស្រាវជ្រាវនិងអភិវឌ្ឍន៍បច្ចេកទេសសុនខហិតរកអ្នកផ្ទុកវីរុសកូវីដ-១៩ នៅវិទ្យាស្ថានបច្ចេកទេសសកម្មភាពកំចាត់មីន ស៊ីម៉ាក់ ខេត្តកំពង់ឆ្នាំង។
ជោគជ័យ ជាជំហានដំបូងនៃការហ្វឹកហ្វឺន សុនខ ក្នុងការស្រង់ក្លិនអ្នកផ្ទុកវីរុសកូវីដ-១៩ បន្ទាប់ពីជោគជ័យជំហានដំបូងនេះ សុនខហិតរកវីរុសកូវីដ-១៩របស់កម្ពុជា នឹងចាប់ផ្តើមហ្វឹកហ្វឺនអនុវត្តផ្ទាល់ជាមួយអ្នកផ្ទុកវីរុសកូវីដ-១៩ តែម្តង។ ក្រោយពីបានទទួលសំណាកក្លិន (VOC) អ្នកជំងឺកូវីដ-១៩ ចំនួន៤៨សំណាកពីក្រុមការងារបច្ចេកទេស នៃសាកលវិទ្យាល័យវិទ្យាសាស្ត្រសុខាភិបាល ដែលសំណាកទាំង៤៨ បានឆ្លងកាត់ត្រួតពិនិត្យ PCR និងការបណ្តុះមេរោគ (Cell Culture) ដើម្បីធានាសុវត្ថិភាពសំណាកក្នុងការបំរើការងារហ្វឹកហ្វឺន ក្រុមជំនាញសុនខស៊ីម៉ាក់ បានដំណើរការហ្វឹកហ្វឺនសុនខហិតក្លិនអ្នកផ្ទុកវីរុសកូវីដ-១៩ នេះតាមផែនការ។
ឯកឧត្តមបាន បញ្ជាក់ថា «សូមអបអរសាទរ ចំពោះសុនខ ក្រុមទី១ ចំនួន៣ក្បាលដែលបានហិតរកឃើញក្លិនសំណាកនៃអ្នកជំងឺកូវីដ-១៩ ប្រកបដោយជោគជ័យ ក្នុងដំណាក់កាលហ្វឹកហ្វឺនស្រាវជ្រាវបឋមនេះ។ រីឯសុនខក្រុមទី២ ចំនួន៧ក្បាលទៀត កំពុងមានវឌ្ឍនភាពគួរឱ្យកត់សំគាល់។ ជាលក្ខណ:បច្ចេកទេសសុនខ អាចហិតរកឃើញក្លិនសំណាក ក្នុងរយៈពេលប្រមាណតែ១០-១៥វិនាទី។ ការប្រើប្រាស់សុនខហិតអ្នកផ្ទុកវីរុសកូវីដ-១៩ មានប្រសិទ្ធភាពសំរាប់ហ្វូងមនុស្សប្រមូលផ្តុំច្រើន ដូចជាព្រលានយន្តហោះ ច្រកទ្វារអន្តរជាតិ និងពហុកីឡាដ្ឋានជាដើម»។
ឯកឧត្តម អគ្គនាយកបានបញ្ជាក់ថា ការសិក្សាស្រាវជ្រាវ និងអភិវឌ្ឍន៍បច្ចេកទេសសុនខហិត រកអ្នកផ្ទុកវីរុសកូវីដ-១៩នេះ ជាគំនិតផ្តួចផ្តើមរបស់សម្តេចតេជោ ហ៊ុន សែន ក្នុងការរិះរកគ្រប់មធ្យោបាយ និងលទ្ធភាពប្រយុទ្ធប្រឆាំងជំងឺកូវីដ-១៩៕
មតិយោបល់