កំពង់ស្ពឺ: បុរសជាឃាតក ដែលយកកាំបិតចុងស្រួចចាក់សម្លាប់នារីក្រមុំម្នាក់ ដែលខ្លួនតាមស្រឡាញ់មិនបាន ហើយប៉ុនប៉ងចាក់សម្លាប់ខ្លួនតាមក្រោយនោះ ត្រូវកម្លាំង សមត្ថកិច្ចការិយាល័យព្រហ្មទណ្ឌកម្រិតធ្ងន់នៃស្នងការដ្ឋាន ខេត្តកំពង់ស្ពឺ បញ្ជូនចេញពីមន្ទីរពេទ្យទៅពន្ធនាគារដើម្បីឃុំខ្លួន ជាបណ្ដោះអាសន្នតាមតំណាងអយ្យការសាលាដំបូងខេត្តកំពង់ស្ពឺ ដោយចោទប្រកាន់ពីបទឃាតកម្មគិតទុកជាមុន។
មន្ត្រីនគរបាលព្រហ្មទណ្ឌបានប្រាប់នៅព្រឹកថ្ងៃទី៣ ខែកញ្ញា ឆ្នាំ២០១៦នេះថា ជនសង្ស័យដែលបានចាក់សម្លាប់នារីក្រមុំ កាត់សម្លៀកបំពាក់នៅផ្សារឧដុង្គ ត្រូវតុលាការបង្គាប់ឲ្យឃុំខ្លួនជាបណ្តោះអាសន្នហើយ តាមដីកាលេខ ៥៧៨ ចុះថ្ងៃទី០២ ខែកញ្ញា ឆ្នាំ២០១៦ ដោយលោក ខ្លួត ពេជ្រ ចៅក្រមស៊ើបសួរសាលាដំបូងខេត្ត ដែលត្រូវផ្ដន្ទាទោសតាមមាត្រា២០០ នៃក្រមព្រហ្មទណ្ឌ។
សូមរំលឹកថា កាលពីព្រឹកថ្ងៃទី២៨ ខែសីហា ឆ្នាំ២០១៦ ចំណុចក្នុងផ្សារឧដុង្គ ឃុំវាំងចាស់ ស្រុកឧដុង្គ ខេត្តកំពង់ស្ពឺ មានជនសង្ស័យម្នាក់ឈ្មោះ ស៊ុ ម៉ូច ភេទប្រុស អាយុ៣២ឆ្នាំ ជាជាងតោន និងបាញ់ថ្នាំរថយន្ត មានទីលំនៅភូមិតាជៀល ឃុំព្រះស្រែ ឃុំវាំងចាស់ ស្រុកឧដុង្គ បានប្រើកាំបិតចុងស្រួចចាក់ទៅលើនារីរងគ្រោះឈ្មោះ ណែម ចន្ធូ ភេទស្រី អាយុ២៤ឆ្នាំ មុខរបរកាត់សម្លៀកបំពាក់ ក្នុងផ្សារឧដុង្គ មានទីលំនៅភូមិឃ្លាំង៥ ឃុំវាំងចាស់ ស្រុកឧដុង្គ ចំនួន៥កាំបិតត្រង់ពោះ និងចុងដង្ហើមបណ្តាលឲ្យស្លាប់ពេលបញ្ជូនទៅដល់មន្ទីរពេទ្យ។ ក្រោយពីធ្វើសកម្មភាពចាក់ជនរងគ្រោះ ជនដៃដល់បានចាក់ខ្លួនឯងចំនួន៣កាំបិតប៉ុនប៉ងសម្លាប់ខ្លួនដែរ ប៉ុន្តែអត់បានសម្រេច គ្រាន់តែរងរបួសធ្ងន់ ហើយត្រូវបញ្ជូនទៅសង្គ្រោះបន្ទាន់នៅមន្ទីរពេទ្យរាជធានីភ្នំពេញ លុះដល់ថ្ងៃទី២ ខែកញ្ញា របួសមានការធូរស្បើយ ក៏បញ្ជូនមកមន្ទីរពេទ្យបង្អែកខេត្តកំពង់ស្ពឺមួយយប់ ទើបព្រឹកថ្ងៃទី ០៣កញ្ញា បញ្ជូនបន្តឲ្យទៅសម្រាកក្នុងពន្ធនាគារខេត្តតែម្តង។
ជនសង្ស័យបានសារភាពថា មូលហេតុ ខ្លួនចាក់លើនារីក្រមុំដែលខ្លួនស្រឡាញ់បណ្តាលឲ្យស្លាប់នោះ ព្រោះតែនាងមិនព្រមទទួលយការស្រឡាញ់ពីខ្លួន ទើបមានការតូចចិត្ត ក៏មានគំនិតសម្លាប់នាង រួចសម្លាប់ខ្លួនតាមក្រោយ។ ប៉ុន្តែគម្រោងរបស់ខ្លួនត្រូវបរាជ័យ ស្លាប់តែនារីដែលខ្លួនស្រឡាញ់ ចំណែករូបគេវិញអត់ស្លាប់ គ្រាន់តែរបួសធ្ងន់ ហើយជួយសង្គ្រោះក្រោយពេលបញ្ជូនដល់មន្ទីរពេទ្យ។
ជនសង្ស័យបានបញ្ជាក់យ៉ាងខ្លីថា បើរូបគេស្រឡាញ់នាង មិនបានទេនោះ អ្នកណាក៏មិនអាចស្រឡាញ់នាងបានដែរ ។ ដូច្នេះមានតែស្លាប់ទាំង២នាក់ ដើម្បីបញ្ចប់បញ្ហា នៃសេចក្តីស្រឡាញ់ដ៏ធំធេងនេះ ប៉ុន្តែលទ្ធផល ភាគីខាងស្រីបានស្លាប់ ហើយខ្លួនបែរជានៅរស់ក្នុងគុកទាំងភាពឈឺចាប់ផ្លូវចិត្ត និងរបួស គ្មានបងប្អូនសាច់ញាតិណាម្នាក់មកមើលឡើយ៕
មតិយោបល់