Post News Media ព័ត៌មានជាតិ អាជ្ញាធរភ្នំព...

អាជ្ញាធរភ្នំពេញស្នើទៅបក្សប្រឆាំងកុំយកមហាជនបិទបាំងកំហុសបុគ្គលផ្ទាល់ខ្លួនដែលបានប្រព្រឹត្តផ្ទុយពីច្បាប់

ភ្នំពេញ: អភិបាលរាជធានីភ្នំពេញ លោក ប៉ា សុជាតិវង្ស បានមានប្រសាសន៍​លើក​ឡើងថា​គណបក្សសង្គ្រោះជាតិ មិនគួរយកបញ្ហាបុគ្គលរបស់លោក កឹម សុខា មកបិទបាំងកំហុស​របស់មេដឹកនាំ​របស់ខ្លួន​នោះឡើយ។

ការលើកឡើងរបស់លោកអភិបាលបែបនេះធ្វើឡើងក្នុងកិច្ចសម្ភាសន៍ជាមួយអ្នកសារព័ត៌មាន កាល​ពីល្ងាច ថ្ងៃទី​២​ ខែកញ្ញា ពោលគឺក្រោយពីលោកបញ្ចប់ការធ្វើដំណើរចុះពិនិត្យភូមិសាស្ត្រ​ដែល​ត្រូវអភិ​វឌ្ឍន៍ផ្លូវនៅសាង​ខាងផ្លូវ​រថភ្លើងចាស់ គិតចាប់ពីចំណុចផ្លូវលេខ៧០ក្នុងសង្កាត់បឹងកក់២ ខណ្ឌទួល​គោក រហូតដល់ចំណុចគីឡូម៉ែត្រ​លេខ៦ សង្កាត់គីឡូម៉ែត្រលេខ៦ ខណ្ឌឬស្សីកែវ ។

លោក កឹម សុខា ប្រធានស្តីទីគណបក្សសង្គ្រោះជាតិ ត្រូវបានតុលាការចោទប្រកាន់ពីបទល្មើសជាក់​ស្តែងក្នុង​ករណីអ្នកតំណាងរាស្ត្ររូបនេះ បដិសេធដីការកោះហៅរបស់តុលាការជាច្រើនលើក ក្នុងការ​ចូលខ្លួន​ធ្វើជាសាក្សី​ពាក់ព័ន្ធរឿងសញ្ចារកម្មជាមួយនាង ខុម ចាន់តារ៉ាទី ហៅស្រីមុំ។

លោក ប៉ា សុជាតិវង្ស បន្តថា «វាជារឿងគណបក្ស ប៉ុន្តែគេពុំគប្បីយករូបភាពមហាជនទៅការពារ​បុគ្គល! ចឹងយើង​នៅតែអំពាវនាវចង់ឲ្យបុគ្គល លោក កឹម សុខា ត្រូវតែមានការទទួលខុសត្រូវជាមួយ​មុខច្បាប់ ហើយត្រូវខិត​ខំអនុ​វត្ត​តាម​ច្បាប់ និង មិនត្រូវគិតថា ការប្រមូលកម្លាំងដើម្បីបង្កើតឲ្យមាន​ចលនាមួយ​ប្រឆាំងច្បាប់ ដែលបញ្ហានេះ ជា​កំហុស! ខ្ញុំគិតថា លោក កឹម សុខា ក៏ដូចជាគណ​បក្ស​សង្គ្រោះជាតិ នឹងពិចារណាបញ្ហានេះឡើងវិញ ព្រោះថា យើងជាអ្នកនយោបាយ យើងជាតំណាង​រាស្ត្រ ជាសមាជិករដ្ឋសភា យើងគួរតែយល់ គួរតែធ្វើគំរូដល់ប្រជាពលរដ្ឋ ជាអ្នកឈានមុខគេ​ក្នុងការអនុវត្តច្បាប់»។

លោកអភិបាលបន្តថា អ្នកនយោបាយត្រូវតែគោរពច្បាប់ ដូចជាប្រជាពលរដ្ឋសាមញ្ញា ដើម្បីកុំឲ្យផ្ទុយ​នឹងនីតិរដ្ឋ និងលទ្ធិប្រជាធិបតេយ្យ ដែលត្រូវប្រទេសប្រកាន់យក និងអនុវត្ត។ លោកបញ្ជាក់ថា បុគ្គល ឬក្រុមដែលប្រ​ព្រឹត្ត​ខុស គឺមានច្បាប់ជាអ្នកកាត់តម្រឹម។ក្នុងរឿងស្នេហាក្រៅតម្រា​នេះ តុលាការ​ក៏​​បានធ្វើការចោទប្រកាន់​មន្ត្រីការពារ​សិទ្ធិមនុស្សអាដហុក៤រូប និងមន្ត្រីគណ:កម្មាធិការជាតិរៀប​ចម្ការបោះឆ្នោត(គ.ជ.ប) ពីបទសូកប៉ាន់សាក្សី និងផ្សំ​គំនិតសូកប៉ាន់ឲ្យនាង ស្រីមុំ បង្ហាញសក្សី​កម្មក្លែងក្លាយ។

តុលាការចាត់ទុកបទល្មើសរបស់លោក កឹម សុខា ដោយយោងតាមមាត្រា៥៣៨ នៃក្រមព្រហ្មទណ្ឌ ដែលចែង​ថា «រាល់បុគ្គលណាដែលត្រូវបានកោះហៅឲ្យចូលមកឆ្លើយ ជាសាក្សីនៅមុខអយ្យការ ឬចៅក្រមស៊ើបសួរ ឬមុខ​តុលាការព្រហ្មទណ្ឌ ហើយមិនព្រមចូលខ្លួន តាមដីកាកោះហៅ​ដោយគ្មាន​មូល​ហេតុសមស្រប ត្រូវផ្តន្ទាទោស​ដាក់ពន្ធនាគារពី១ខែ ទៅ៦ខែ និងពិន័យជាប្រាក់ពី១សែនរៀល ទៅ១លានរៀល» ៕

អភិបាលរាជធានី

អភិបាលរាជធានី

អភិបាលរាជធានី