(Reuters) - កាលពីថ្ងៃពុធ លោកប្រធានាធិបតីលោក Joe Biden បាននិយាយថា កងទ័ពអាមេរិកអាចបន្តនៅអាហ្វហ្គានីស្ថាន ដើម្បីជម្លៀសជនជាតិអាមេរិកនៅមុនថ្ងៃកំណត់ ទី៣១ ខែសីហា និងមន្ទីរបញ្ចកោណបាននិយាយថា នៅពេលបច្ចុប្បន្ននេះ យោធាសហរដ្ឋអាមេរិកមិនមានសមត្ថភាពដើម្បីជួយប្រជាជនដែលស្ថិតនៅក្រៅអាកាសយានដ្ឋានទីក្រុង Kabul បានឡើយ ។
លោកប្រធានាធិបតី Biden បានប្រាប់សារព័ត៌មាន ABC ថា “បើសិនជាមានប្រជាជនអាមេរិកស្ថិតនៅ ទីនោះនៅឡើយ យើងនឹងនៅបន្តរហូតដល់យើងជម្លៀសពួកគេចេញអស់” នៅក្នុងបទសម្ភាសន៍ដែលធ្វើឡើងនៅថ្ងៃដែលសមាជិកសភាអាមេរិកជាច្រើននាក់បានដាក់សម្ពាធឲ្យរូបលោកពន្យារថ្ងៃដកទ័ពចេញទាំងស្រុង។
លោកប្រធានាធិបតី Biden បានទទួលរងការរិះគន់យ៉ាងខ្លាំងចំពោះដំណោះស្រាយការដកកងទ័ពរបស់លោក ដែលបណ្តាលឲ្យ ក្នុងរយៈពេលប៉ុន្មានថ្ងៃថ្មីៗនេះ ប្រទេសអាហ្គាហ្វនីស្ថានត្រូវបានគ្របដណ្តប់ដោយភាពវឹកវរទាំងនៅក្នុង និងជុំវិញអាកាសយានដ្ឋានទីក្រុង Kabul ដោយមានមនុស្សជាច្រើននាក់ព្យាយាមយ៉ាងខ្លាំងដើម្បីចាកចេញពីប្រទេសនេះ។
លោកប្រធានាធិបតី Biden បានការពារការសម្រេចចិត្តរបស់លោក ដោយនិយាយថា បញ្ហាទាំងនេះគឺជៀសមិនរួចទេក្នុងការបញ្ចប់ការចូលរួមរបស់សហរដ្ឋអាមេរិកអស់រយៈពេល ២០ឆ្នាំនៅទីនោះកន្លងមកនេះ។
លោកបាននិយាយថា ខ្ញុំមិនដឹងថាតើ“ គំនិតដែលគិតថាមានមធ្យោបាយដើម្បីចាកចេញដោយគ្មានភាពវឹកវរកើតឡើងនោះ” អាចធ្វើឡើងយ៉ាងដូចម្តេចនោះទេ។
លោកក៏បាននិយាយផងដែរថា ក្រុមតាលីបង់កំពុងសហការក្នុងពេលនេះ ដើម្បីជួយជម្លៀសជនជាតិអាមេរិកជាច្រើននាក់ចេញពីប្រទេសនេះ ប៉ុន្តែ “យើងកំពុងជួបការលំបាកមួយចំនួន” ក្នុងការជម្លៀសពលរដ្ឋអាហ្វហ្គានីស្ថានដែលមានសម្ព័ន្ធភាពជាមួយសហរដ្ឋអាមេរិក។
កងកម្លាំងតាលីបង់វាយដណ្តើមយកអាហ្វហ្គានីស្ថានវិញបានយ៉ាងឆាប់រហ័ស ខណៈដែលកម្លាំងសហរដ្ឋអាមេរិក និងបរទេសដទៃទៀតដកខ្លួនចេញពីប្រទេសនេះ ដែលនាំឲ្យមានភាពចលាចលនៅក្នុងអាកាសយានដ្ឋាន ដោយក្រុមមន្ត្រីការទូត ពលរដ្ឋបរទេស និងជនជាតិអាហ្វហ្គានីស្ថានព្យាយាមភៀសខ្លួនចេញ ប៉ុន្តែពួកគេត្រូវបានរារាំងដោយសារតែមនុស្សច្រើន និងប៉ុស្តិ៍ត្រួតពិនិត្យរបស់ក្រុមតាលីបង់ ៕
មតិយោបល់