CAMSOC-ភ្នំពេញ៖ ឯកឧត្តម វ៉ាត់ ចម្រើន អគ្គលេខាធិការគណ:កម្មាធិការជាតិអូឡាំពិកកម្ពុជា(NOCC) បានមានប្រសាសន៍ថា កម្ពុជាបានត្រៀមលក្ខណ:សម្បត្តិរួចរាល់ហើយ ដើម្បីចូលរួមព្រឹត្ដិការណ៍កីឡាអាស៊ី លើកទី១៩ ឆ្នាំ២០២២ (19th Asian Games Hangzhou 2022) នៅទីក្រុង Hangzhou នៃសាធារណ:រដ្ឋប្រជាមានិតចិន ។
អគ្គលេខាធិការគណ:កម្មាធិការជាតិ CAMSOC ដដែលបានបញ្ជាក់ថា «គណ:កម្មាធិការជាតិអូឡាំពិកកម្ពុជា បានទទួលលិខិតអញ្ជើញ ដើម្បីចូលរួមព្រឹត្តិការណ៍ 19th Asian Games Hangzhou 2022 ហើយកម្ពុជាបានត្រៀមខ្លួនហើយជាស្រេច ដើម្បីចូលរួមការប្រកួតកីឡាអាស៊ី នៅទីក្រុង Hangzhou ។ ជួបគ្នានៅទីក្រុង Hangzhou ការប្រកួតកីឡាអាស៊ី ឆ្នាំ២០២២» ។
ចំពោះព្រឹត្តិការណ៍ 19th Asian Games Hangzhou 2022 គ្រោងប្រព្រឹត្តទៅរយ:ពេល ១៦ថ្ងៃ ចាប់ពីថ្ងៃទី១០ ដល់ថ្ងៃទី២៥ ខែកញ្ញា ឆ្នាំ២០២២ ដោយម្ចាស់ផ្ទះចិន បានកំណត់កីឡាចំនួន ៤០ប្រភេទ ដាក់ក្នុងការប្រកួតព្រឹត្តិការណ៍ប្រចាំទ្វីប ៤ឆ្នាំម្ដងនេះ ។
សូមរំឮកថា ក្នុងការប្រកួតកីឡាអាស៊ី ២លើកចុងក្រោយ កម្ពុជាបានបើកទំព័រប្រវត្តិសាស្ដ្រធំៗ ទី១-ការប្រកួតកីឡាអាស៊ី លើកទី១៧ ឆ្នាំ២០១៤ នៅសាធារណរដ្ឋកូរ៉េ កម្ពុជាដណ្ដើមមេដាយមាស ១គ្រឿងលើកដំបូង ដោយវីរកីឡាការិនីតេក្វាន់ដូ ស៊ន សៀវម៉ី ទី២-ការប្រកួតកីឡាអាស៊ី លើកទី១៨ ឆ្នាំ២០១៨ នៅឥណ្ឌូនេស៊ី កម្ពុជាបានបំបែកកំណត់ត្រាថ្មីដណ្ដើមបានមេដាយមាស ២គ្រឿង និងសំរឹទ្ធ ១គ្រឿង ក្នុងនោះវីរកីឡាការិនីជឺជិតស៊ូ ខាន់ ចេសា ឈ្នះមេដាយមាស ១ និងវីរកីឡាករម៉ូតូទឹក សាលី អ៊ូមើត ឈ្នះមេដាយមាស ១ និងសំរឹទ្ធ ១ ៕
មតិយោបល់