(Reuters) - កាលពីថ្ងៃព្រហស្បតិ៍ នគរបាលអេស្ប៉ាញបាននិយាយថា បានចាប់ខ្លួនអតីតប្រធានអង្គភាពស៊ើបការណ៍យោធាវេណេស៊ុយអេឡាដែលមានឈ្មោះថា Hugo Carvajal ដែលលោកបានលាក់ខ្លួនចាប់តាំងពីតុលាការអេស្ប៉ាញបានយល់ព្រមធ្វើបត្យាប័នទៅកាន់សហរដ្ឋអាមេរិកដែលមានរយ:ពេលជិតពីរឆ្នាំមកហើយ ។
ក្នុងបណ្តាញសង្គម tweeter ដែលមានបង្ហាញវីដេអូនៃការឃាត់ខ្លួននោះ នគរបាលអេស្ប៉ាញបាននិយាយថា “លោក Pollo Carvajal ត្រូវចាប់ខ្លួននៅយប់នេះនៅ Madrid នៅពេលដែលលោករត់គេចពីយុត្តិធម៌ និងការធ្វើបត្យាប័នទៅអាមេរិក” ។
ប៉ុន្តែនគរបាលមិនបានផ្តល់ព័ត៌មានលំអិតបន្ថែមអំពីការចាប់នោះទេ ដោយគ្រាន់តែនិយាយថាលោក Carvajal “កំពុងរស់ក្នុងភាពឯកោទាំងស្រុង” ។
មេធាវីរបស់លោក Carvajal នៅអេស្ប៉ាញគឺលោកស្រី Maria Dolores Arguelles បានបញ្ជាក់ថា លោក Carvajal ត្រូវបានចាប់ខ្លួន ប៉ុន្តែបានបដិសេធមិនផ្តល់ព័ត៌មានលម្អិតបន្ថែមទេក្រៅពីនិយាយថា កូនក្តីរបស់លោកស្រីនឹងបង្ហាញខ្លួននៅចំពោះមុខតុលាការកំពូលអេស្ប៉ាញនៅព្រឹកថ្ងៃសុក្រនេះ។
លោក Carvajal គឺជាអតីតឧត្តមសេនីយ៍ និងជាសម្ព័ន្ធមិត្តរបស់មេដឹកនាំវ៉េណេស៊ុយអេឡាលោក Hugo Chavez។
មន្ត្រីសហរដ្ឋអាមេរិកបានស្វែងរកលោក Carvajal ជាយូរមកហើយព្រោះពួកគេជឿថាប្រសិនបើលោកមានឆន្ទ:ក្នុងការសហការនោះគាត់អាចផ្តល់នូវព័ត៌មានដ៏សំខាន់អំពីសកម្មភាពគ្រឿងញៀនដែលត្រូវបានចោទប្រកាន់ពាក់ព័ន្ធប្រធានាធិបតីវេណេស៊ុយអេឡាលោក Nicolas Maduro និងសហការី ៕
មតិយោបល់