ដំណឹងនេះ ត្រូវបាន​ប្រកាសឲ្យដឹង ដោយ​លោក Khin Maung Zaw ប្រធានក្រុមមេធាវី ការពារក្តីជូន​​លោកស្រីអ៊ុងសាន ស៊ូជី នៅលើទំព័រ ហ្វេសប៊ុក របស់​ផ្ទាល់តែម្តង។ អ្នកនាំពាក្យ​របបសិកភូមា បានបញ្ជាក់ថា រដ្ឋាភិបាលពិតជាបានចេញ លិខិតបញ្ជានេះមែន។ លិខិតនេះ ហាម​លោក Khin Maung Zaw ចាប់ពីថ្ងៃទី​ ១៤តុលាទៅ មិនឲ្យទាក់ទង ឬជួបជាមួយ​អ្នកកាសែតក្នុងស្រុក និងក្រៅស្រុក​ មិនឲ្យជួប​ជាមួយតំណាងអង្គទូតបរទេស និងអង្គការអន្តរជាតិទាំងអស់ មិនថាដោយផ្ទាល់ ឬដោយប្រយោលទេ។ លិខិតនេះ បាន​លើកហេតុផលថា ការទំនាក់ទំនងទាំងអស់នេះ គឺអាច​បង្កឲ្យ​មានចលាចល ខូចសណ្តាប់ធ្នាប់សាធារណៈ។

កាលពីថ្ងៃអង្គារកន្លងទៅ ក្រោយ​ចប់សវនាការ លោក មេធាវី Khin Maung Zaw បានរៀបរាប់​ប្រាប់អ្នកកាសែត អំពីប្រសាសន៍ឆ្លើយ​បំភ្លឺរបស់ លោក Win Myint អតីតប្រធានាធិបតីភូមា ដែលត្រូវ​ក្រុមកងទ័ពទំលាក់ពីមុខងារ។ លោក​Win Myint បានថ្លែងថា នៅថ្ងៃទី​១កុម្ភៈ នៅពេល​ពួកកងទ័ព ចុះមកចាប់រូប​លោក លោក​បាន​ប្រាប់​ទៅ​កងទ័ពថា លោកសុខចិត្តស្លាប់ តែ​​មិនចុះចេញពីតំណែងជាដាច់ខាត។

សូមបញ្ជាក់ថា លោកមេធាវី Khin Maung Zaw គឺជាប្រភពព័ត៌មានតែមួយគត់ សម្រាប់​អង្គទូត អង្គការនានា និងបណ្តាញ​ព័ត៌មាន ដើម្បីអាចដឹងអំពីដំណើរការប្រព្រឹត្តិទៅ ក្នុងអង្គសវនាការ កាត់ទោស​លោកស្រីអ៊ុងសាន ស៊ូជី ព្រមទាំងលោកអតីតប្រធានាធិបតី Win Myint ព្រោះថាសវនាការ​នេះធ្វើឡើងដោយ​បិទទ្វារជិត។ លោកស្រី អ៊ុងសាន ស៊ូជី ដែលកំពុងជាប់ឃុំ មិនអាចមានទំនាក់ទំនងជាមួយ​ពិភព​ខាងក្រៅ អាចជួប​មេធាវីលោកស្រី តែក្នុងពេល​សវនាការតែប៉ុណ្ណោះ។

ថ្មីៗនេះ សមាគមអាស៊ាន បាន​អំពាវនាវ ឲ្យរបបសិក គោរពការសន្យាទាំង៥ចំណុច។ តែយ៉ាងណា លោក Zaw Min Tun អ្នកនាំពាក្យ​របបសិកភូមា បាន​លើកឡើងថា ភូមាមិនបាន​បិទផ្លូវ មិនឲ្យ​តំណាងអាស៊ាន ចូលទៅភូមាទេ តែតំណាងអាស៊ាន មិនអាចទៅជួប​លោកស្រី អ៊ុងសាន ស៊ូជី បានឡើយ​ ព្រោះលោកស្រីកំពុងប្រឈមនឹងទោសឧក្រិដ្ឋ។

គួរកត់សំគាល់ថា រហូតមកទល់ពេលនេះ វិបត្តិនៅភូមា មិនទាន់មានដំណោះស្រាយអ្វីទាំងអស់ ដោយ​របបសិក កាន់តែបង្ហាញជំហរ រឹងទទឹង។ អង្គការសហប្រជាជាតិ និងអង្គការមនុស្សធម៌នានា កំពុងតែព្រួយបារម្ភ អំពីការផ្ទុះសង្គ្រាមស៊ីវីល រវាងកងទ័ពភូមា ជាមួយនឹង​ក្រុមឧទ្ទាមជាច្រើនក្រុម ខណៈដែលវិបត្តិសេដ្ឋកិច្ចកំពុងតែរុករានជីវភាពរបស់​ប្រជាជនភូមា៕