(ប៉ារីស)៖ ប្រធានាធិបតីបារាំង លោក អែមម៉ានុយអែល ម៉ាក្រុង បានថ្កោលទោសដោយចាត់ទុកថាការបង្ក្រាបយ៉ាងបង្ហូរឈាមលើបាតុករជាជនជាតិ អាល់ហ្សេរី ពីសំណាក់ប៉ូលិសក្នុងទីក្រុងប៉ារីសកាលពីជាង ៦០ឆ្នាំមុន គឺជា «បទឧក្រិដ្ឋមិនអាចលើកលែងឱ្យបាន»។

នៅក្នុងសេចក្ដីថ្លែងការណ៍ចេញផ្សាយកាលពីថ្ងៃសៅរ៍ ទី១៦ ខែតុលានេះ, វិមានប្រធានាធិបតីបារាំងអេលីសេ (Elysee) បានបន្ថែមថាលោក ម៉ាក្រុង បានទទួលស្គាល់ថាបាតុកម្មរបស់ជនជាតិអាល់ហ្សេរីត្រូវបានបង្ក្រាបយ៉ាងបង្ហូរឈាម, ហិង្សា និងយ៉ាងសាហាវឃោរឃៅ ដោយក្នុងនោះបាតុករអាល់ហ្សេរី ១២,០០០នាក់ ត្រូវបានចាប់ខ្លួន និងរាប់រយនាក់ត្រូវបានសម្លាប់ និងរងរបួស។

កាលពីថ្ងៃទី១៧ ខែតុលា ឆ្នាំ១៩៦១, នៅក្រោមបទបញ្ជារបស់អតីតមេបញ្ជាការប៉ូលិសទីក្រុងប៉ារីស លោក ម៉ូរីស ប៉ាប៉ុង (Maurice Papon), ប៉ូលិសបាន បើកការបង្រ្កាបយ៉ាងបង្ហូរឈាមលើក្រុមបាតុករ ២៥,០០០នាក់ មកពីរណសិរ្សរំដោះជាតិអាល់ហ្សេរី (FLN) ដែលនាំគ្នាធ្វើបាតុកម្មតវ៉ាប្រឆាំងនឹងបម្រាម គោចរលើជនជាតិអាល់ហ្សេរី។

ចំនួនអ្នកស្លាប់នៅក្នុងការបង្រ្កាបរបស់ប៉ូលិសលើជនជាតិអាល់ហ្សេរីកាលពីឆ្នាំ១៩៦១ មិនត្រូវបានបញ្ជាក់ឱ្យច្បាស់ពីរដ្ឋាភិបាលបារាំងទេ តែ អ្នកប្រវត្តិសាស្ត្រខ្លះជឿជាក់ថាបាតុករច្រើនជាង ២០០នាក់បានស្លាប់ ហើយក្នុងនោះមានសាកសពមួយចំនួនត្រូវបានគេបោះចោលក្នុងទឹកទន្លេសែន (River Seine)៕

ប្រភព៖ Reuters