(សេអ៊ូល)៖ កូរ៉េខាងជើង បានបាញ់សាកល្បងមីស៊ីលបាលិស្ទីគមួយគ្រាប់ ទៅកាន់តំបន់សមុទ្រនៃឆ្នេរភាគខាងកើតរបស់ខ្លួននៅថ្ងៃអាទិត្យនេះ និងដែលអាច ក្លាយជាការធ្វើតេស្ដមីស៊ីលលើកទី៧ នៅក្នុងខែមករានេះ ខណ:អ្នកជំនាញអះអាងថាវាអាចជាការធ្វើតេស្ដមីស៊ីលរយ:ចម្ងាយឆ្ងាយជាលើកដំបូងបំផុត ចាប់តាំងពីឆ្នាំ២០១៧មក។

នៅក្នុងសេចក្ដីថ្លែងការណ៍របស់ខ្លួន យោធាកូរ៉េខាងត្បូងបានឱ្យដឹងថាមីស៊ីលបាលិស្ទីគខាងលើ ត្រូវបានកូរ៉េខាងជើងបាញ់សាកល្បងនៅម៉ោង ៧៖៥២នាទី ព្រឹកមិញនេះ (ម៉ោងនៅក្នុងតំបន់) ចេញពីខេត្តចាហ្គាំង (Jagang) ឆ្ពោះទៅកាន់តំបន់សមុទ្រនៃឆ្នេរភាគខាងកើតនៃប្រទេស។

ដោយឡែក បើតាមនាយកខុទ្ទការល័យរដ្ឋាភិបាលជប៉ុន លោក Hirokazu Matsuno មីស៊ីលដែលកូរ៉េខាងជើងបានតេស្ដ ត្រូវបានក្រុមអ្នកជំនាញវាយតម្លៃថា បានហោះដល់រយ:កម្ពស់ ២,០០០គីឡូម៉ែត្រ និងហោះបានរយ:ពេល៣០នាទី ព្រមទាំងធ្លាក់នៅ ចម្ងាយ ៨០០គីឡូម៉ែត្រ ពីទីតាំងបាញ់ចេញ។

ម្យ៉ាងវិញទៀត ប្រសិនជាការធ្វើតេស្ដមីស៊ីល នេះត្រូវបានកូរ៉េខាងជើងទទួលស្គាល់មែន នោះវានឹងក្លាយជាការធ្វើតេស្ដមីស៊ីលជាលើកទី៧ នៅក្នុងខែមករានេះ បន្ទាប់ពីលោក គីម ជុងអ៊ុនប្ដេជ្ញាចិត្តបន្ត ការអភិវឌ្ឍ និងពង្រឹងសមត្ថភាពយោធា៕

ប្រភព៖ Reuters