(វ៉ាស៊ីនតោន)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គីបាននិយាយថា លោកបានត្រៀមខ្លួនជាស្រេចដើម្បីជួបចរចា ស្វែងរកកិច្ចព្រមព្រៀងសន្តិភាព ជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន តែព្រមពេលជាមួយគ្នា លោកក៏បានព្រមានដែរថា ប្រសិនបើកិច្ចចរចាទទួលបរាជ័យ នោះសង្រ្គាមលោកលើកទី៣ អាចនឹងផ្ទុះឡើង។

សហរដ្ឋអាមេរិក និងអង្គការ NATO បានបញ្ជាក់ជាច្រើនលើកថាពួកគេនឹងមិនបញ្ជូនកងទ័ពឱ្យទៅជួយអ៊ុយក្រែន ប្រយុទ្ធ ដោយផ្ទាល់ជាមួយកងទ័ពរុស្ស៊ីទេ ហើយក៏បានបដិសេធបង្កើត «តំបន់គ្មានការហោះហើរ» នៅក្នុងប្រទេសអ៊ុយក្រែនផងដែរ ដោយសារ បារម្ភខ្លាចផ្ទុះសង្រ្គាមនុយក្លេអ៊ែរ ឬសង្រ្គាមលោកលើកទី៣។ តែបានសន្យាថានឹងចាត់់វិធានការឆ្លើយតប បើប្រទេសជាសមាជិក NATO ណាមួយរងការវាយប្រហារពីរុស្ស៊ី។

ថ្លែងនៅក្នុងបទសម្ភាសន៍ជាមួយទូរទស្សន៍ CNN កាលពីថ្ងៃអាទិត្យចុងសប្ដាហ៍កន្លងទៅនេះ លោកប្រធានាធិបតីអ៊ុយក្រែន បានបញ្ជាក់ដូច្នេះថា «ខ្ញុំត្រៀមខ្លួនជាស្រេចដើម្បីជួបចរចាជាមួយលោក (លោក ពូទីន)។ ខ្ញុំបានត្រៀមខ្លួនអស់រយ:ពេល២ឆ្នាំមកនេះ ហើយខ្ញុំគិតថាបើគ្មានកិច្ចចរចាទេ នោះយើងនឹងមិនអាចបញ្ចប់សង្រ្គាមនេះបានឡើយ។ ដូច្នេះខ្ញុំយល់ថាយើងគួរចាប់យកឱកាសដើម្បី អាចរៀបចំកិច្ចចរចាជាមួយលោក ពូទីន។ ប៉ុន្តែ ប្រសិនបើការព្យាយាមទាំងនេះទទួលបរាជ័យ នោះវាមានន័យថាសង្រ្គាមលោកលើកទី៣ អាចនឹងផ្ទុះឡើង»៕