(ព្រុចសែល)៖ មេដឹកនាំសហភាពអឺរ៉ុប នៅថ្ងៃព្រហស្បតិ៍សប្ដាហ៍នេះបានសម្រេចផ្ដល់ «ឋាន:ជាបេក្ខភាព» ដល់អ៊ុយក្រែនជាផ្លូវការហើយ ដែលនេះជា ការបោះជំហានមួយដ៏សំខាន់ឆ្ពោះទៅរកសមាជិកភាពចូលរួមក្នុងក្លឹបប្រទេសទាំង ២៧។

នៅក្នុងកិច្ចប្រជុំកំពូលខាងលើ មេដឹកនាំអឺរ៉ុបក៏បានប្រកាសផ្ដល់ឋាន:ជាបេក្ខភាពដល់ប្រទេសម៉ុលដាវីផងដែរ រីឯហ្ស៊កហ្ស៊ីនឹងត្រូវផ្ដល់ឋាន: បែបនេះ នៅពេលអាចបំពេញតាមលក្ខខណ្ឌពេញលេញ។

ការប្រកាសខាងលើរបស់មេដឹកនាំអឺរ៉ុប ធ្វើឡើងនៅក្នុងកិច្ចប្រជុំកំពូលសហភាពអឺរ៉ុប ដែលប្រព្រឹត្តទៅពីថ្ងៃទី២៣ ដល់ថ្ងៃទី២៤ ខែមិថុនានេះ។ ថ្លែងនាឱកាសនោះ ប្រមុខគោលនយោបាយការបរទេសសហភាពអឺរ៉ុប លោក ចូសែប បូរែល (Josep Borrell) បានគូសបញ្ជាក់ដូច្នេះថា «ប្រជាជន អ៊ុយក្រែនគឺជាសមាជិកគ្រួសារអឺរ៉ុប។ អនាគតរបស់អ៊ុយក្រែនគឺនៅជាមួយសហភាពអឺរ៉ុប ហើយថ្ងៃនេះជាការចាប់ផ្ដើមដំណើរផ្លូវដ៏វែងឆ្ងាយដែលយើង នឹងត្រូវដើរជាមួយគ្នា»។

ដោយឡែក ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ក៏បានសាទរចំពោះការសម្រេចចិត្តរបស់មេដឹកនាំសហភាពអឺរ៉ុបផងដែរ ដោយចាត់ទុក ថាវាជាការសម្រេចចិត្តជាប្រវត្តិសាស្ត្រ ទោះជាអ៊ុយក្រែនត្រូវបានគេជឿជាក់ថាអាចនឹងត្រូវចំណាយពេលរាប់ឆ្នាំឯណោះដើម្បីអាចក្លាយជាសមាជិក សហភាពអឺរ៉ុប។ ប៉ុន្តែអ្វីដែលសំខាន់ នោះគឺការសម្រេចចិត្តផ្ដល់ឋាន:ជាបេក្ខភាពនៅពេលនេះ វាជានិមិត្តរូប និងជាការបង្ហាញពីឆន្ទ:នយោបាយកាន់តែខ្លាំង របស់សហភាពអឺរ៉ុបចំពោះអ៊ុយក្រែន ដែលកំពុងតស៊ូប្រយុទ្ធប្រឆាំងនឹងការឈ្លានពានរបស់រុស្ស៉ី៕

ប្រភព៖ Reuters