វៀតណាម: វុងតាវជាតំបន់ សេដ្ឋកិច្ច ពាណិជ្ជកម្ម និងទេសចរណ៍ ជាប់មាត់សមុទ្រដ៏មានប្រជាប្រិយភាព និងទាក់ទាញដ៏ធំមួយ ហើយក៏ជាតំបន់មួយដែលកំពុងមានការប្រកួតប្រជែងជាមួយតំបន់សេដ្ឋកិច្ច ពាណិជ្ជកម្ម និងទេសចរណ៍សំខាន់ៗជាច្រើនទៀតនៅប្រទេសវៀតណាម។
កញា សុខ ស្រីទូច លេខាក្រុមហ៊ុនទេសចរណ៍ឥណ្ឌូឆាយណា ហែរីធេក ត្រាវែល បានឲ្យដឹងកាលពីថ្ងៃទី១៨ ខែកញ្ញា ក្នុងដំណើរទស្សនកិច្ចរបស់ក្រុមអ្នកសារព័ត៌មានទៅកាន់ទីក្រុងវុងតាវថា តំបន់ជានេះកំពង់មានការអភិវឌ្ឍន៍ខ្លាំងណាស់ លើវិស័យដឹកជញ្ជូន ពាណិជ្ជកម្ម ទេសចរណ៍ និងជាតំបន់ប្រេងកាតរបស់ទីក្រុងហូជីមិញ។ ប្រជាជននៅក្នុងតំបន់នេះភាគច្រើនគឺជាអ្នកជំនួញ អ្នកនេសាទ អាជីវកម្មទេសចរណ៍ និងមួយផ្នែកជាទៀតប្រកបរបរកសិកម្ម។
កញាបន្តថា ដោយមើលឃើញពីការរីកចម្រើន និងការអភិវឌ្ឍន៍យ៉ាងឆាប់រហ័សដូចនេះ បានជាក្រុមហ៊ុនទេសចរណ៍ឥណ្ឌូឆាយណា ហែរីធេក ត្រាវែល មានកិច្ចសហប្រតិបត្តិការជាមួយដៃគូរ ក្នុងប្រទេសវៀតណាម ដូចជាមន្ទីពេទ្យអន្តរជាតិ ភុកអានខាង និងដៃគូរដទៃទៀត ដើម្បីបង្កើតកញ្ចប់ទេសចរណ៍សុខាភិបាល ទេសចរណ៍ ក៏ដូចជាកម្មវិធីប្រតិភូរបស់រដ្ឋាភិបាលសម្រាប់ប្រជាជន និងប្រទេសក្នុងតំបន់ ពិសេសរវាងប្រជាជនកម្ពុជានិងវៀតណាម។
ស្រីទូចបន្តថា «ក្រៅពីកញ្ចប់ទេសចរមកប្រទេសវៀតណាម ក៏មានកញ្ចប់ទេសចរទៅកាន់ប្រទេសជាច្រើនទៀតនៅលើពិភពលោក ដូចជា បារាំង អូស្រ្តាលី ចិន ជប៉ុន កូរ៉េ ថៃ ម៉ាឡេស៊ី និងប្រទេសនៅប៉ែកអឺរ៉ុបផងដែរ ។ តាមរយ:ដំណើរទស្សនកិច្ចរបស់ក្រុមអ្នកសារព័ត៌មានលើកនេះ រំពឹងថានឹងមានប្រជាពលរដ្ឋកម្ពុជាកាន់តែច្រើនធ្វើដំណើរមកកម្សាន្ត និងស្វែងរកសេវាសុខភាពល្អៗ មកវិនិយោគ ឬធ្វើជំនួញផ្សេងៗជាមួយដៃគូរនៅក្នុងប្រទេស»។
លោក វ៉ាន់ធី សុមុន្នី មន្រ្តីក្រសួងពាណិជ្ជកម្ម ដែលបានរួមដំណើរទៅទស្សនកិច្ចជាមួយកញ្ចប់ទេសចរណ៍នោះដែរបានលើកឡើងថា កញ្ចប់ទេសចរណ៍របស់ក្រុមហ៊ុននេះល្អ ម៉្យាងការដើរទេសចរនៅក្នុងប្រទេសជិតខាង គឺបានស្វែងយល់ពីសក្កដានុពល វប្បធម៌ ទំនៀមទម្លាប់ ប្រពៃណី និងចរន្តសេដ្ឋកិច្ច ពាណិជ្ជកម្ម និងទេសចរណ៍ ពីគ្នាទៅវិញទៅមក លើសពីនេះក៏អាចស្វែងរកឱកាសចាប់ដៃគូរធ្វើពាណិជ្ជកម្ម ឬ វិនិយោគលើវិស័យផ្សេងៗរបស់ប្រទេសនីមួយៗ។ យ៉ាងណាលោកថា ក្រុមទេសចរណ៍នីមួយៗត្រូវតែបង្កើនសេវាកម្ម បដិសណ្ឋារកិច្ច និងអាហារកិច្ចឲ្យបានកាន់តែប្រសើរថែមទៀត ដើម្បីស្រូបយកអតិថិជន និងភ្ញៀវទេសចរណ៍ បានកាន់តែច្រើន។
សូមបញ្ជាក់ថា តំបន់សេដ្ឋកិច្ច វុងតាវ ជាតំបន់ជាប់មាត់សមុទ្រ ដែលមានសក្កដានុពល លើផ្នែកសេវាកម្មដឹកជញ្ជូនតាមផ្លូវទឹក ពាណិជ្ជកម្ម ទេសចរណ៍ និងការជីកយកប្រេងកាតនៅបាតសមុទ្រ ។ វុងតាវមានចម្ងាយផ្លូវប្រមាណជាង៩៩គីឡូម៉ែត្រពីទីក្រុងហូជីមិញ មានផ្ទៃដីទំហំ១៩៨៧គីឡូម៉ែត្រការ៉េ មានប្រជាជនរស់នៅប្រមាណជាង១លាននាក់ ពួកគេភាគច្រើនប្រកបរបរនេសាទនិងទេសចរណ៍ ប្រជាជនមានជីវភាពល្អប្រសើរ ៕
មតិយោបល់