Post News Media ព័ត៌មានជាតិ USAID និងសាកល...

USAID និងសាកលវិទ្យាល័យភូមិន្ទកសិកម្ម បើកឲ្យប្រើប្រាស់ជាផ្លូវការ CE SAIN

ភ្នំពេញ: មជ្ឈមណ្ឌលឧត្តមភាព ប្រពលវប្បកម្មកសិកម្ម និរន្តរភាព និងអាហារូបត្ថម្ភហៅកាត់ថា(CE SAIN)​ នៅសាកលវិទ្យាល័យភូមិន្ទកសិកម្ម ត្រូវបានដាក់ឲ្យប្រើប្រាស់ជាផ្លូវការនៅថ្ងៃទី២២ ខែកញ្ញានេះ ដើម្បីជម្រុញ នវានុវត្តន៍លើ​វិស័យ​ឯកជន សម្របសម្រួលការស្រាវជ្រាវ ការអប់រំ និងការបណ្តុះបណ្តាល កសិកម្ម តាមរយ:កិច្ចសហប្រតិបត្តិការ និងការចែករំលែកចំ​ណេះដឹងដែលមានលក្ខណ:ល្អប្រសើរ។

ការប្រកាសនេះនេះធ្វើឡើងស្របពេលនិងការចុះហត្ថលេខា លើអនុស្សារណ:យោគយល់គ្នារវាងសាកលវិទ្យាល័យភូមិន្ទកសិកម្ម និងទីភ្នាក់ងាសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) ដែលនឹងគាំទ្រមជ្ឈមណ្ឌលនេះតាមរយ:កម្មវិធី Feed the Future Presidential Intiative របស់រដ្ឋាភិបាលសហរដ្ឋអាមេរិក។

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ់និងនេសាទ និងលោក Wiliam A.Heidt ឯកអគ្គរដ្ឋទូតសហរដ្ឋអាមេរិក​ប្រចាំកម្ពុជា ធ្វើជាសក្ខីភាពក្នុងពិធីចុះហត្ថលេខារវាង លោក ង៉ោ ប៊ុនថាន សាកលវិទ្យាធិការសាកលវិទ្យាល័យភូមិន្ទកសិកម្ម និង​លោកស្រី Polly Donford នាយក USAID។

លោកស្រី Polly Donford លើកឡើងថា «តាមរយ:នវានុវត្តន៍នៃកម្មវិធីសន្តិសុខស្បៀងសម្រាប់អនាគត ដែលប្រមូលផ្តុំ​ដោយ​សាកលវិទ្យាល័យដែលមានជំនាញឯកទេសល្អ របស់សហរដ្ឋអាមេរិក ដើម្បីដោះស្រាយបញ្ហាប្រឈមធំៗនៅលើពីភពលោក លើ​ផ្នែកកសិកម្ម និងសន្តិសុខ ស្បៀង យើងមានសេចក្តីរីករាយ និងគាំទ្រកិច្ចការសាកលវិទ្យាល័យភូមិន្ទកសិកម្ម ដែលបានបំពេញ​ការងារដ៏ល្អជាមួយដៃគូម្ចាស់ជំនួយ លើកិច្ចសហការស្រាវជ្រាវកន្លងមក»។

លោក ង៉ោ ប៊ុនថាន មានជំនឿចិត្តចំពោះមជ្ឈមណ្ឌលឧត្តមភាព ប្រពលវប្បកម្មកសិកម្មនិរន្តរភាពនិងអាហារូបត្តម្ភដែល​បង្កើត​ថ្មី​នេះ ថានឹងផ្តល់នូវការបណ្តុះបណ្តាល និងគាំទ្រការស្រាវជ្រាវ ដល់អ្នកជំនាញកសិកម្មកម្ពុជា នាពេលអនាគត ដែលពួកគេត្រូវការ​ដើម្បីទទួលជោគជ័យ។

គួរបញ្ជាក់ថា នៅប្រទេសកម្ពុជា មន្ទីរពិសោធន៍នវានុវត្តន៍បាននឹងកំពុងធ្វើការជាដៃគូជាមួយ សាកលវិទ្យាល័យភូមិន្ទកសិកម្ម និង​បង្កើតបានជាបច្ចេកទេស នវានុវត្តន៍ដែលមានការទទួលស្គាល់ និងគួរតែត្រូវពង្រីកការផ្សព្វផ្សាយ ដើម្បីឲ្យមានការអនុវត្ត​បានកាន់​តែច្រើន ប៉ុន្តែមិនទាន់អាចធ្វើបាននៅឡើយ ដោយសារខ្វះខាតនូវការសម្របសម្រួលរវាងមន្ទីរពិសោធន៍ នវានុវត្តន៍ទាំងនេះ។

តាមរយ:មជ្ឈមណ្ឌលនេះ សាកលវិទ្យាល័យភូមិន្ទកសិកម្មនឹងបង្កើនអនុភាព សហការគ្នា និងសម្របសម្រួលមន្ទីរ​ពិសោធន៍​នវា​នុវត្តន៍ជាមួយវិស័យសាធារណ: និងឯកជន ហើយអ្នកវិទ្យា សាស្រ្ត និស្សិត អ្នកអនុវត្តផ្ទាល់មកពីគ្រឹះស្ថានសិក្សា ភ្នាក់ងារដ្ឋា​ភិ​បាល ភ្នាក់ងារមិនមែនរដ្ឋាភិបាលនិងក្រុមហ៊ុនឯកជន នឹងមានឱកាសក្នុងការបង្ហាញបច្ចេកវិទ្យាប្រពលវប្បកម្ម កសិកម្មនិរន្តភាព​ចុងក្រោយ និងអាហារូបត្ថម្ភទៅពលរដ្ឋ អ្នករៀបចំគោលនយោបាយ និងភ្នាក់ងារផ្តល់ជំនួយ។ ថវិកា២,៥លានដុល្លារអាមេរិក នឹង​ផ្តល់ជាជំនួយដើម្បីធ្វើឲ្យប្រសើរឡើងនូវសមត្ថភាពអប់រំ ស្រាវជ្រាវ និងផ្សព្វផ្សាយរបស់សាស្រ្តាចារ្យ ដោយផ្តល់ជាមូលនិធិសម្រាប់​ការ​ស្រាវជ្រាវ ដើម្បីបង្កើតឲ្យបានយ៉ាងហោចណាស់មន្ទីរពិសោធន៍ចំនួន៥នៅសាកលវិទ្យាល័យនេះ ផ្តល់ជាអាហារូបករណ៍​សម្រាប់​ការ​សិក្សា​ថ្នាក់បរិញ្ញាបត្រជាន់ខ្ពស់ និងបណ្ឌិតជំនាញកសិកម្ម និងបង្កើតឲ្យមានការអនុវត្តនូវការរួមបញ្ចូលរវាងធុរ:កិច្ច និងនវានុវត្តន៍នៅសាកលវិទ្យាល័យភូមិន្ទកសិកម្ម ៕

USAID

USAID

USAID

USAID

USAID

USAID