បាត់ដំបង: បុរសម្នាក់បានលង់ទឹកស្លាប់យ៉ាងអាណោចអាធ័ម បន្ទាប់ពីគាត់បានចុះទៅជួយស្រង់ក្មេងៗជាច្រើននាក់ដែលកំពុងលង់ទឹក រហូតដល់លង់ស្លាប់ខ្លួនឯង ។ ហេតុការណ៍នេះបានកើតឡើងកាលពីវេលាម៉ោង ៣និង៣០នាទី ថ្ងៃទី២ ខែតុលា ឆ្នាំ២០១៦ ស្ថិតនៅចំណុចកកោះរលុះ ខាងលិចភូមិរោគ ឃុំស្ពានស្រែង ស្រុកភ្នំស្រុក ខេត្តបាត់ដំបង ។
សមត្ថកិច្ចនគរបាលមូលដ្ឋាន ដែលបានចុះទៅធ្វើការពិនិត្យសាកសពដល់កន្លែងកើតហេតុ បានឲ្យដឹងថា សាកសពជនរងគ្រោះខាងលើនេះ មានឈ្មោះ សរ សីភេទប្រុស អាយុ២៧ឆ្នាំ រស់នៅភូមិស្វាយ ឃុំសរសរស្តម្ភ ស្រុកពួក ខេត្តសៀមរាប ។
បើយោងតាមប្រភពព័ត៌មានពីក្រុមគ្រួសារជនរងគ្រោះបានឲ្យដឹងថា មុនពេលកើតហេតុ ជនរងគ្រោះរួមនឹងក្រុមគ្រួសារ បាននាំគ្នាមកលេងនៅស្រុក ក្នុងពិធីបុណ្យភ្ជុំបិណ្ឌ ដោយមានក្មេងៗកូនក្មួយរបស់ជនរងគ្រោះបានចុះលេងទឹក ខណ:នោះស្រាប់តែឃើញក្មេងៗលង់ទឹក ទើបជនរងគ្រោះប្រញាប់ចុះជួយស្រង់ក្មេងរងគ្រោះម្តងម្នាក់ៗ រហូតជួយសង្គ្រោះអាយុជីវិត បានទាំងអស់គ្នា ។ខណ:ដែលជនរងគ្រោះកំពុងនៅកន្លែងទឹកជ្រៅ ហើយទំនងជាហត់ខ្លាំងពេកនោះ ក៏លង់ខ្លួនឯងស្លាប់តែម្តង បង្កឲ្យមានការភ្ញាក់ផ្អើលដល់ក្រុមគ្រួសារ និងសមត្ថកិច្ចចុះមកធ្វើការពិនិត្យនិងធ្វើកោលស្យវិច្ឆ័យទៅលើសាកសពជនរងគ្រោះបានឲ្យដឹងថា សាកសពជនរងគ្រោះពិតជាស្លាប់ដោយសារតែលង់ទឹក ពិតប្រាកដមែន ហើយបច្ចុប្បន្នសាកសពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារធ្វើបុណ្យតាមប្រពៃណីនៅឯស្រុកកំណើត៕
មតិយោបល់