Post News Media ព័ត៌មានជាតិ អ្នកនាំពាក្យថ...

អ្នកនាំពាក្យថា៖ ចៅក្រមស៊ើបសួរនឹងពិនិត្យ សម្រេចអំពីការស្តាប់ចម្លើយភរិយាលោក កែម ឡី

ភ្នំពេញ: ឆ្លើយតបនឹងសំណួររបស់អ្នកសារព័ត៌មាន៖ តើតុលាការនឹងមាននីតិវិធីបែបណា ខណ:ភរិយាយលោកកែមទ្បីនៅក្រៅប្រទេស ហើយទើបតែឆ្លងទន្លេទៀតនោះ?

លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានថ្លែងប្រាប់ក្រុមអ្នកសារព័ត៌មានតាមបណ្តាញទំនាក់ទំនងសង្គម Telegram ថា «ចៅក្រមស៊ើបសួរនឹងពិនិត្យ និងសម្រេចអំពីការស្តាប់ចម្លើយរបស់ដើមបណ្តឹងនៅកាលបរិច្ឆេទដោយអនុលោមតាមនីតិវិធីជាធរមាន»។

អ្នកនាំពាក្យរូបនេះបានឆ្លើយតបនឹងសំណួរ៖ ភាគីខាងគ្រួសារលោកបណ្ឌិត កែម ឡី បានមានប្រសាសន៍ថា មិនបានដាក់ពាក្យបណ្តឹងទេ ហេតុអីបានជាតុលាការចេញដីកាកោះ? ថា «ចៅក្រមស៊ើបសួរបានកោះហៅប្រពន្ធលោក កែម ឡី ក្នុងឋាន:ជាដើមបណ្តឹងរដ្ឋប្បវេណី»។

ចំពោះសំណួរថា៖ ប្រសិនបើភរិយាលោកកែមឡី មិនអាចចូលខ្លួនឆ្លើយតាមកាលកំណត់ តើចៅក្រមស៊ើបសួរអាចនឹងកោះហៅជាលើកទី៣ទេ? លោកបានបញ្ជាក់ផងដែរថា «យើងត្រូវរង់ចាំដល់កាលបរិច្ឆេទនៃការស្តាប់ចម្លើយសិន ទើបដឹងថាចៅក្រមស៊ើបសួរនឹងមានចំណាត់ការអ្វីទៀតចំពោះករណីនេះ»។

បើយោងតាមដីកាកោះ (លើកទី២) ចុះថ្ងៃទី២៦ ខែកញ្ញា ឆ្នាំ២០១៦ របស់លោក សេង លាង ចៅក្រម ស៊ើបសួរនៃសាលាដំបូងរាជធានីភ្នំពេញ បានតម្រូវលោក ស្រី ប៊ូ រចនា ជាភរិយារបស់លោក បណ្ឌិត កែម ឡី ចូលខ្លួនបំភ្លឺក្នុងនាមជាដើមបណ្តឹងរដ្ឋប្បវេណី នៅ រសៀលថ្ងៃទី ១៧ ខែតុលា ឆ្នាំ២០១៦ខាងមុខ។

គួររំឭកថា ខណ:ដែលតុលាការចេញដីកាកោះហៅជាលើកទី២នេះ លោកស្រី ប៊ូ រចនា ភរិយារបស់លោក កែម ឡី កំពុងសម្រាកសម្រាលកូន នៅមន្ទីរពេទ្យនាក្រៅប្រទេសកាលពីល្ងាចថ្ងៃអាទិត្យទី២ ខែតុលា ឆ្នាំ២០១៦នេះ។ ការចាកចេញទៅសម្រាលកូននៅក្រៅប្រទេសនេះ គឺមានរយ:ពេលជិត៣ខែ ក្រោយមរណភាព របស់ស្វាមីលោកស្រី។

សូមជម្រាបផងដែរថា ជនត្រូវចោទឈ្មោះ ជួប សំលាប់ ត្រូវបាន លោក សេង លាង ចៅក្រមសើបសួរសម្រេចឃុំខ្លួនជាបណ្តោះអាសន្នកាលពីរសៀលថ្ងៃទី១៣ ខែកក្កដា ឆ្នាំ២០១៦ ក្រោមការចោទប្រកាន់ពី បទឃាតកម្មគិតទុកជាមុននិងបទកាន់កាប់អាវុធគ្មានការអនុញ្ញាត យោងតាមមាត្រា២០០ និងមាត្រា ៤៩០ នៃក្រមព្រហ្មទណ្ឌ។

គួររំឭកថា ជនត្រូវចោទឈ្មោះ ជួប សំលាប់ ភេទប្រុស អាយុ ៣៨ឆ្នាំ បានបាញ់សំលាប់ជនរងគ្រោះឈ្មោះ កែម ឡី ភេទប្រុស អាយុ៤៦ឆ្នាំ មុខរបរ ប្រធានអង្គការអភិវឌ្ឍន៍សង្គម មានទីលំនៅផ្ទះលេខ០៨E0 ផ្លូវលេខ៣៩២ សង្កាត់បឹងកេងកង១ ខណ្ឌចម្ការមន រាជធានីភ្នំពេញ នៅក្នុងស្តារម៉ាត របស់ស្ថានីយ៍ប្រេងឥន្ធន:កាល់តិច បូកគោ កាលពីវេលាម៉ោង៨ និង៥០នាទី ព្រឹកថ្ងៃទី១០ ខែកក្កដា ឆ្នាំ២០១៦៕

អ្នកនាំពាក្យ

អ្នកស្រី ប៊ូ រចនា​

អ្នកស្រី ប៊ូ រចនា​