ភ្នំពេញ: អគ្គិសនីកំពង់ចាម បានជូនដំណឹងពីការផ្អាកការផ្គត់ផ្គង់ចរន្តអគ្គិសនីនៅតំបន់ភ្លើងមួយចំនួនក្នុងខេត្តចំនួន៤ រួមមានខេត្តត្បូងឃ្មុំ ក្រចេះ ព្រៃវែង និងខេត្តស្វាយរៀង រយ:ពេល២ថ្ងៃជាប់ៗគ្នា។ នេះបើតាមការជូនដំណឹងរបស់អគ្គិសនីកំពង់ចាម នាព្រឹកថ្ងៃទី៧ ខែតុលា។

អគ្គិសនីកំពង់ចាម ឲ្យដឹងថា នៅថ្ងៃសៅរ៍ ទី៨ និងថ្ងៃអាទិត្យ ទី៩ ខែតុលា ឆ្នាំ២០១៦ ចាប់ពីម៉ោង៧៖០០ព្រឹក រហូតដល់ម៉ោង៥៖០០ល្ងាច អគ្គិសនីកំពង់ចាម នឹងផ្អាកការផ្គត់ផ្គង់ចរន្តនៅតំបន់ភ្លើងមួយចំនួនទៅតាមពេលវេលា និងទីកន្លែងដូចខាងក្រោម៖

– ចាប់ពីផ្សារខ្នារ រហូតដល់ឃុំដូនតី ស្រុកពញាក្រែក ខេត្តត្បូងឃ្មុំ ក្នុងដែនអាជ្ញាប័ណ្ណសេវាករ ស្រ៊ិន ឈន និងនាឡិកាស្ទង់លក់ថាមពលឲ្យអគ្គិសនីព្រៃវែង និងអគ្គិសនីស្វាយរៀង

– ចាប់ពីផ្លូវបំបែកប្រធាតុ រហូតដល់ស្រុកតំបែរ ស្រុកក្រូចឆ្មារ និងឃុំកំពាន់ ឃុំគគី ស្រុកមេមត់ ខេត្តត្បូងឃ្មុំ

– ចាប់ពីស្ពានកំពង់រាំង រហូតដល់នាឡិកាស្ទង់លក់ថាមពលឲ្យអគ្គិសនីក្រចេះ ខេត្តក្រចេះ។

ការសម្រេចផ្អាកការផ្គត់ផ្គង់ភ្លើងរយ:ពេល២ថ្ងៃជាប់គ្នានេះ ត្រូវអគ្គិសនីកំពង់ចាម បញ្ជាក់ថា ដើម្បីឲ្យក្រុមហ៊ុនសាងសង់បណ្ដាញផ្លាស់ប្ដូរបង្គោល MV ពី១២ម៉ែត្រ ទៅ១៤ម៉ែត្រ និងអូសខ្សែបណ្ដាញបញ្ជូនរងតង់ស្យុង២២គីឡូវ៉ុល នៅក្រោមគន្លងខ្សែបញ្ជូនរងតង់ស្យុង២២គីឡូវ៉ុល ដែលផ្ដត់ផ្គង់ថាមពលទៅស្រុកតំបែរ ខេត្តត្បូងឃ្មុំ ខេត្តក្រចេះ ខេត្តព្រៃវែង និងខេត្តស្វាយរៀង។

អគ្គិសនីកំពង់ចាម នឹងភ្ជាប់ចរន្តអគ្គិសនីជូនអតិថិជនឲ្យបានប្រើប្រាស់ឡើងវិញ ទៅតាមការជាក់ស្ដែងនៅពេលការងារបញ្ចប់៕