បាត់ដំបងៈ ថ្ងៃទី០៩ ខែតុលា ឆ្នាំ២០១៦ ឧត្តមសេនីយ៍ឯក រុន រ័ត្នវាសនា ប្រធានក្រុមការងារចុះជួយឃុំអន្លងវិល ឃុំអូរដំបង១ និងឃុំរកា ស្រុកសង្កែ ខេត្តបាត់ដំបង ព្រមទាំងសហការីបានចុះតាមខ្នងផ្ទះក្រើនរំលឹកនិងជំរុញប្រជាពលរដ្ឋគ្រប់អាយុបោះឆ្នោតក្នុងឃុំទាំងបីមានចំនួន ៣០.០៩៦នាក់ ដោយគិតមកដល់ពេលនេះមានប្រជាពលមកចុះឈ្មោះចំនួន ១២.៧៤៨នាក់ (ស្រី ៦.៦១០នាក់) ឲ្យទៅចុះឈ្មោះបោះឆ្នោតឲ្យបានគ្រប់ៗគ្នា ចំពោះបងប្អូនប្រជាពលរដ្ឋចំណាកស្រុកទៅទីជិតទីឆ្ងាយក៏ត្រូវឆ្លៀតពេលវេលាត្រឡប់មកចុះឈ្មោះផងដែរដើម្បីបំពេញកាតព្វកិច្ចជាប្រជាពលរដ្ឋ ក្នុងនោះលោកឧត្តមសេនីយ៍ឯកបានបញ្ជាក់ទៀតថា ករណីបងប្អូនប្រជាពលរដ្ឋខកខានមិនបានចុះឈ្មោះទេនោះ នឹងមិនមានសិទ្ធិបោះឆ្នោតឡើយ ទោះធ្លាប់បានចុះឈ្មោះបោះឆ្នោតពីមុនក្តី។

ឧត្តមសេនីយ៍ឯក រុន រ័ត្នវាសនា សូមអំពាវនាវនិងជុំរុញបងប្អូនប្រជាពលរដ្ឋដែលនៅសេសសល់មិនទាន់បានអញ្ជើញមកចុះឈ្មោះបោះឆ្នោត សូមរួសរាន់មកចុះឈ្មោះបោះឆ្នោតឲ្យបានទាន់ពេលវេលាកំណត់របស់គណៈកម្មាធិការជាតិរៀបចំការបោះឆ្នោត ដែលកំណត់បញ្ចប់ការចុះឈ្មោះត្រឹមថ្ងៃទី២៩ ខែវិច្ឆិកា ឆ្នាំ២០១៦ និងសូមជំរុញដល់ក្រុមការងារត្រូវបន្តចុះក្រើនរំលឹកប្រជាពលរដ្ឋតាមខ្នងផ្ទះក្នុងឃុំទាំងបីបន្តទៀត៕