ភ្នំពេញ: សម្តេចអគ្គមហាពញាចក្រី ហេង សំរិន ប្រធានរដ្ឋសភា បានគាំទ្រលោក ប៉ាយ ហ្ស៊ីចាន(Bai Zhijan) ប្រធានគណ:កម្មាធិការកិច្ចការបរទេស នៃសភាប្រជាជនចិន និងជាអនុប្រធាន មជ្ឈមណ្ឌលផ្លាស់ប្តូរវប្បធម៌អន្តរជាតិចិន ដើម្បីផ្សព្វផ្សាយឱសថបុរាណរបស់ចិន នៅក្នុងប្រទេសកម្ពុជា ដើម្បីលើកកម្ពស់សុខមាលភាពប្រជាជន និងជម្រុញការបណ្តុះបណ្តាលធនធានមនុស្សលើវិស័យឱសថបុរាណ។

លោក កែវ ពិសិដ្ឋ នាយកខុទ្ទការល័យសម្ដេច ហេង សំរិន បានមានប្រសាសន៍បា្រប់ក្រុមអ្នកសារព័ត៌មាន ក្រោយជំនួបពិភាក្សាការងារជាមួយសម្តេច ហេង សំរិន និងលោក ប៉ាយ ហ្ស៊ីចាន(Bai Zhijan) នៅថ្ងៃទី១៧ ខែតុលា ឆ្នាំ២០១៦ថា “សម្ដេចប្រធានរដ្ឋសភា បានសម្ដែងការគាំទ្រ ចំពោះការរៀបចំធ្វើសិក្ខាសាលាផ្សព្វផ្សាយពីការផ្លាស់ប្តូរវប្បធម៌ផ្នែកឱសថសាស្រ្តបែបបុរាណរវាងកម្ពុជា និងចិននេះឡើង ក៏ដូចជាចូលរួមគ្នាអភិវឌ្ឍន៍ និងលើកកម្ពស់ ផ្នែកឱសុទ្ធបុរាណនៅកម្ពុជាផងដែរ”។

លោកបន្ដថា ការអភិឌ្ឍន៍វិទ្យាសាស្ដ្របុរាណចិន ដ៏ទំនើបព្យាបាលតាមបែបបុរាណ សំខាន់បំផុតនៅកម្ពុជា ដើម្បីចូលរួមលើកកម្ពស់សុខភាពប្រជាជនកម្ពុជា ក៏ដូចជាបង្កើតមជ្ឈមណ្ឌលផ្លាស់ប្តូរ វប្បធម៌អន្តរជាតិចិន និងបានជួយព្យាបាលជំងឺជូនប្រជាពលរដ្ឋកម្ពុជា ក៏ដូចជាប្រជាជននៅលើពិភពលោកដែលបានមកធ្វើការងារនិងរកទទួលទាននៅក្នុងប្រទេសកម្ពុជា ជាមួយគ្នានោះ លោកប្រធានក៏បានអញ្ជើញអ្នកតំណាងរាស្ដ្រកម្ពុជា ទៅទទួលសេវាពិនិត្យ និងព្យាបាល សុខភាព ដោយឥតគិតថ្លៃ ដោយវិជ្ជសាស្រ្តបុរាណដ៏ល្បីៗនៅមកពីប្រទេសចិន ពិនិត្យនិងព្យាបាលនៅក្នុងសណ្ឋាគារភ្នំពេញ។

សូមបញ្ជាក់ថា នៅថ្ងៃនេះមានប្រជាពលរដ្ឋកម្ពុជា ប្រមាណជាង៤០០នាក់ បានទៅទទួលការពិនិត្យសុខភាពដោយឥតគិតថ្លៃ៕