ភ្នំពេញ: កាលពីព្រឹកថ្ងៃទី១៨ ខែតុលា ឆ្នាំ២០១៦ លោក លឹម សុភា អភិបាលខណ្ឌ រួមទាំងក្រុមការងារ បានចុះត្រួតពិនិត្យតាមសង្កាត់ទាំង៣ នៅក្នុងខណ្ឌ៧មករា ដែលកំពុងអនុវត្តគម្រោងមូលនីធិអភិវឌ្ឍសង្កាត់ឆ្នាំ២០១៦ ដោយដាក់ប្រព័ន្ធលូនិងធ្វើផ្លូវបេតុងតាមសង្កាត់ទាំង៣ មានដូចជា សង្កាត់មនោរម្យ សង្កាត់អូរឫស្សី២ សង្កាត់វាលវង់ ខណ្ឌ៧មករា។

យោងតាមការរៀបរាប់ពីលោក ចិក សារឿន ចៅសង្កាត់មនោរម្យបានឲ្យដឹងថា នៅតាមផ្លូវ១០៩ មានការដាក់ប្រព័ន្ធលូ ប្រវែង៤៣៣ម៉ែត្រ ដែលជាគម្រោងមូលនីធិអភិវឌ្ឍសង្កាត់មនោរម្យឆ្នាំ២០១៦ ចំណាយទឹកប្រាក់៩០០លានរៀនជាង ដែលដេញថ្លៃដោយក្រុមហ៊ុនផលមរកត ។

លោកស្រី កែវ សាកល ចៅសង្កាត់វាលវង់ បានបង្ហាញអំពីផ្លូវទាំង៣ខ្សែ ដែលមានការដាក់ប្រព័ន្ធលូថ្មីនិងធ្វើផ្លូវបេតុងផង គឺផ្លូវ១៦១ ផ្លូវ២១៥ និង ផ្លូវលំមួយខ្សែទៀត ប្រព័ន្ធលូថ្មីមានប្រវែង២៦៣ម៉ែត្រ និង ធ្វើផ្លូវបេតុងថ្មីមានប្រវែង២៨៦ម៉ែត្រ ដោយចំណាយទឹកប្រាក់១១២លានរៀលជាង ដែលជាគម្រោងមូលនីធិអភិវឌ្ឍសង្កាត់វាលវង់ឆ្នាំ២០១៦ ដោយដេញថ្លៃពីក្រុមហ៊ុនហៃម៉ានីម៉ិច ។

លោក ចាន់ ពិសិដ្ឋ ចៅសង្កាត់អូរឫស្សី២ បានឲ្យដឹងថា មានការដាក់ប្រពន្ធលូថ្មីប្រវែង១០៥ម៉ែត្រ នៅលើផ្លូវ១៦៤ និងធ្វើផ្លូវបេតុងថ្មីដឿងហែមប្រវែង១៩៧ម៉ែត្រ ចំណាយទឹកប្រាក់ជាង៧០លានរៀន ដែលជាគម្រោងមូលនីធិអភិវឌ្ឍសង្កាត់អូរឫស្សី២ ដែលដេញថ្លៃដោយក្រុមហ៊ុន គឹម ច័ន្ទសម្ភស្បន៍។

ក្រុមការងារដែលដឹកនាំដោយលោក លឹម សុភា ចុះត្រួតពិនិត្យតាមការដ្ឋាននីមួយៗ ក៏មានការសំណូមពរពីប្រជាពលរដ្ឋ អំពីបញ្ហាសំរាមដោយគ្មានធុងដាក់សម្រាប់រងចាំរថយន្តមកដឹកហើយនៅរដូវភ្លៀងក៏ហូរចូលទៅក្នុងលូឬក៏ស្ទះមុខលូផងដែរ។ លោកអភិបាលបានណែនាំឲ្យមន្ត្រីជំនាញរៀបចំដោះស្រាយតាមសំណូមពរ ដើម្បីរក្សាបរិស្ថាន សណ្តាប់ធ្នាប់ សេវាសាធារណ: និង រក្សាសន្តិសុខជូនពលរដ្ឋក្នុងមូលដ្ឋាន ហើយលោកក៏បានផ្តាំផ្ញើរដល់ប្រជាពលរដ្ឋពេលបានប្រព័ន្ធលូថ្មីនិងផ្លូវបេតុងថ្មីហើយជួយថែរក្សាពីសំណាក់បងប្អូន ព្រមទាំងអញ្ជើញទៅចុះឈ្មោះបោះឆ្នោតតាមមូលដ្ឋានសង្កាត់នានាក្នុងខណ្ឌ៧មករាឲ្យបានគ្រប់ៗគ្នា៕