ក្រចេះ: កម្លាំងកងរាជអាវុធហត្ថលើផ្ទៃប្រទេស សហការជាមួយនិងកម្លាំងអាវុធហត្ថស្រុកស្នួល ឆ្មក់បង្ក្រាបបទល្មើសព្រៃឈើ ឃាត់បានរថយន្តមួយគ្រឿង ស្ត្រីម្នាក់ រួមនិងឈើជ្រលង់ម្រេចជាច្រើនដើម។ ការបង្ក្រាបនេះដែរ បានធ្វើឡើងកាលពីវេលាម៉ោង ៩ព្រឹកថ្ងៃទី១៩ ខែតុលា ឆ្នាំ២០១៦ ស្ថិតនៅចំណុចក្នុងភូមិជ្រោះជ្រៅ ឃុំ២ធ្នូ ស្រុកស្នួល ខេត្តក្រចេះ។

លោកវរសេនីយ៍ទោ ស្រ៊ុន សោភ័ណ្ឌ មន្ត្រីកងរាជអាវុធហត្ថខេត្តក្រចេះ បានប្រាប់ឲ្យដឹងថា នៅក្នុងប្រតិបត្តិការបង្ក្រាបនោះផងដែរ កម្លាំងកងរាជអាវុធហត្ថ ក៏បានធ្វើការឃាត់ខ្លួនបានជនល្មើសចំនួនម្នាក់ មានឈ្មោះ និន រ៉ានី ភេទស្រី អាយុ២២ឆ្នាំ រស់នៅភូមិអណ្តែងដូន សង្កាត់ក្រគរ ក្រុងក្រចេះ ខេត្តក្រចេះ។ ជាក់ស្តែងនៅក្នុងការបង្ក្រាបនេះដែរ កម្លាំងបានធ្វើការដកហូតវត្ថុតាងមួយរួមមាន រថយន្តចំនួន០១គ្រឿង ម៉ាកសាំយ៉ុង ពណ៌ទឹកប្រាក់ ពាក់ស្លាកលេខ ភ្នំពេញ 2Q-5029 រួមនិងឈើជ្រលង់ម្រេច ចំនួន ៦៧ដើម។

បច្ចុប្បន្ន ជនសង្ស័យរួមនិងវត្ថុតាង ត្រូវមន្ត្រីជំនាញកងរាជអាវុធហត្ថខេត្តក្រចេះ កំពុងកសាងសំណុំរឿង ដើម្បីប្រគល់ទៅឲ្យខាងខណ្ឌរដ្ឋបាលព្រៃឈើ ចាត់ការបន្តតាមនិតិវិធីច្បាប់ ៕