កណ្តាល: នៅព្រឹកថ្ងៃទី២៥ ខែតុលា ឆ្នាំ២០១៦ លោក ងួន វុទ្ធី អនុប្រធានសាលាដំបូងខេត្តកណ្តាល និងជាចៅក្រមជំនុំជម្រះសំណុំរឿងព្រហ្មទណ្ឌ បទ ឆបោកមានស្ថានទម្ងន់ទោស ដោយសម្រេចប្រកាសសាលក្រមស្តីទោសទណ្ឌ ទៅថ្ងៃទី២២ ខែវិច្ឆិកា ឆ្នាំ២០១៦វិញ។

មន្រ្តីអនុរក្យពន្ធនាគារខេត្តកណ្តាលបានប្រាប់ឲ្យដឹងថា ជនជាប់ឃុំដែលត្រូវបានចៅក្រមលើកពេលប្រកាសទោសនោះគឺឈ្មោះ អៀក ភណ្ឌ័ ភេទប្រុស អាយុ៣៧ឆ្នាំ ជាប់ចោទពីបទឆបោកមានស្ថានទម្ងន់ទោស។

សូមរំឭកថា ចៅក្រមស៊ើបសួរសាលាដំបូងខេត្តកណ្តាល លោក គឹម ម៉េង កាលពីល្ងាចថ្ងៃទី១៨ មិនា ឆ្នាំ២០១៦ បានសម្រេចធ្វើការឃុំខ្លួនជនល្មើស ដែលប្រើទូរសព្ទទំនាក់ទំនង ឆបោកថ្នាក់ដឹកនាំក្រោមបទ ចោទប្រកាន់ឆបោកមានស្ថានទម្ងន់ទោស យោងបញ្ញាត្តិមាត្រា៣៧៧ និង៣៨០ នៃច្បាប់ក្រមព្រហ្មទណ្ឌ។

លោកឧត្តមសេនីយ៍ សំ តុលា មេបញ្ជាការកងរាជអាវុធហត្ថខេត្តកណ្តាល បានឲ្យដឹងថា ជនសង្ស័យឈ្មោះ អៀក ភណ្ឌ័ ភេទប្រុស អាយុ៣៧ឆ្នាំ មុខរបរមិនពិតប្រាកដ ស្នាក់នៅផ្ទះជួលម្តុំ មន្ទីរពេទ្យលោកសង្ឃ (ពេទ្យព្រះកេតុមាលា ឬពេទ្យព្រះកុសុម: ) រាជធានីភ្នំពេញ ត្រូវបានកម្លាំងអាវុធហត្ថខេត្តកណ្តាល សហការជាមួយកម្លាំងអាវុធហត្ថលើផ្ទៃប្រទេស និងខណ្ឌទួលគោក ចាប់ឃាត់ខ្លួនបាននៅម៉ោង៦និង៤០នាទី យប់ថ្ងៃទី១៦ មិនា ឆ្នាំ២០១៦ ចំណុចផ្ទះផ្ទេរនិងដកប្រាក់វីង តាមបណ្តោយផ្លូវ២៩៩ ម្តុំផ្សារទួលគោក សង្កាត់ទឹកល្អក់២ ខណ្ឌទួលគោក។

លោកមេបញ្ជាការកងរាជអាវុធហត្ថបានឲ្យដឹងថាជនល្មើសខាងលើបានធ្វើសកម្មភាពឆបោកថ្នាក់ដឹកនាំចំនួន៦លើកមកហើយ ដោយប្រើទូរសព្ទទំនាក់ទំនងរាយការណ៍ពីបទល្មើសហើយឲ្យផ្ញើលុយតាមវីងមកឲ្យខ្លួន។លើកចុងក្រោយនេះឆបោកចំ លោកអភិបាលខេត្តកណ្តាល។

លោកមេបញ្ជាការបានបន្តឲ្យដឹងទៀតថា អភិបាលខេត្តកណ្តាល ក្រោយទទួលបានព័ត៌មាន ពីជនមិនស្គាល់មុខទូរសព្ទរាយការមកលោកថា មានមេខ្លោងជួញដូរគ្រឿងញៀនពីខេត្តក្រចេះ ធ្វើដំណើរមកភ្នុំពេញនិងសុំមិនឲ្យលោកទំនាក់ទំនងទៅសមត្តកិច្ចនគរបាល ព្រោះមិនទុកចិត្ត កាលពីថ្ងៃទី១៦ មិនា ឆ្នាំ២០១៦។ ភ្លាមៗលោកអភិបាល ក៏បញ្ជាឲ្យកម្លាំងអាវុធហត្ថខេត្តកណ្តាល ដឹកនាំដោយលោក ឧត្តមសេនីយ៍ត្រី សំ តុលា មេបញ្ជាការអាវុធហត្ថខេត្ត ធ្វើការស្រាវជ្រាវ និងស៊ើបអង្កេតជាបន្ទាន់ថា តើមានករណីនេះកើតឡើងមែន ឫមួយយ៉ាងណា?។ បន្ទាប់ពី ដឹកនាំកម្លាំងលោកមេបញ្ជាការបានទាក់ទងជនសង្ស័យខាងលើ ស្រាប់តែជននេះ ចេះតែសុំលុយមុនដើម្បីទិញកាតទូរសព្ទ និងបញ្ហាផ្សេងៗ។ ដោយសារតែឃើញ សកម្មភាព និងទង្វើបស់ជនសង្ស័យរូបនេះដូចមិនស្រួល មេបញ្ជាការអាវុធហត្ថ ខេត្តកណ្តាល ក៏មានការសង្ស័យ ហើយឲ្យជំនាញទាក់ទងទៅ មន្រ្តីអាវុធហត្ថលើផ្ទៃប្រទេស ដើម្បីឆែកលេខទូរសព្ទ ក៏ដឹងថាជនសង្ស័យនៅភ្នំពេញ។

ក្រោយដឹងពីរឿងទាំងនេះ ក៏សន្និដ្ឋានថា នេះជាករណីឆរបោកតាមទូរសព្ទ ពេលនោះកម្លាំងជំនាញកងរាជអាវុធហត្ថខេត្តកណ្តាល ដឹកនាំដោយលោកមេបញ្ជាការរង ទូច អ៊ីណាន តាមការឯកភាពពី ព្រះរាជ អាជ្ញាខេត្តកណ្តាល លោក លឹម សុគន្ថា និងព្រះរាជអាជ្ញារាជធានីភ្នំពេញ ដោយមានកិច្ចសហការ ជាមួយកម្លាំងអាវុធហត្ថ ខណ្ឌទួលគោក និងអាវុធហត្ថលើផ្ទៃ ធ្វើការតាមដានរហូត ចាប់បានជនសង្ស័យតែម្តង ស្ថិតនៅកន្លែងផ្ទេរប្រាក់វីង តាមបណ្តោយផ្លូវ២៩៩ ម្តុំផ្សារទួលគោក ក្នុងសង្កាត់ទឹកល្អក់២ ខណ្ឌទួលគោក ក្រោយពីជនសង្ស័យ បានទៅបើកយកលុយជាង១០០ដុល្លារ ដែលមន្រ្តីអាវុធហត្ថខេត្តបានផ្ញើជូន ៕

//youtu.be/jgdeeqY0VNA