ព័ត៌មានជាតិ

តុលាការនឹងប្រកាសសាលក្រមសំណុំរឿង លោក ហុង សុខហួរ នៅថ្ងៃស្អែក

ភ្នំពេញ: ប្រសិនមិនមានការប្រែប្រួលនោះទេ តុលាការនឹងប្រកាសសាលក្រមសម្រេចទោស លោក ហុង សុខហួរ សមាជិកព្រឹទ្ធសភា គណបក្ស សម រង្ស៊ី នៅរសៀលថ្ងៃទី៧ ខែវិច្ឆិកា ឆ្នាំ២០១៦ស្អែកនេះ។

សូមបញ្ជាក់ថា លោក រស់ ពិសិដ្ឋ ប្រធានក្រុមប្រឹក្សាចៅក្រមជំណុំជម្រះសាលាដំបូងរាជធានីភ្នំពេញ បានបើក សវនាការកាត់ទោសលោក ហុង សុខហួរ សមាជិកព្រឹទ្ធសភា គណបក្ស សម រង្ស៊ី អស់ពេលពេញមួយថ្ងៃទី២៦ ខែតុលា ឆ្នាំ២០១៦ ពាក់ព័ន្ធសំណុំរឿង ក្លែងបន្លំឯកសារសន្ធិសញ្ញា ស្តីពី ព្រំដែនគោករវាង ប្រទេសកម្ពុជា និងប្រទេសវៀតណាម។

លោក ហុង សុខហួរ ត្រូវបានលោក សៀង សុខ តំណាងអយ្យការ សម្រេចចោទប្រកាន់ពីបទ ក្លែងបន្លំ ឯកសារសាធារណ: បទប្រើប្រាស់ឯកសារសាធារណ:ក្លែង និង បទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម យោងតាមមាត្រា ៦២៩ មាត្រា ៦៣០ និង មាត្រា ៤៩៥ នៃក្រមព្រហ្មទណ្ឌ ពាក់ព័ន្ធករណីការក្លែងសន្ធិសញ្ញា ព្រំដែនកម្ពុជា-វៀតណាម ឆ្នាំ១៩៧៩ ត្រង់ មាត្រា ៤ និងយក ឯកសារក្លែងនោះទៅបង្ហោះលើទំព័រហ្វេសប៊ុករបស់ លោក សម រង្ស៊ី។

នៅក្នុងសវនាការកាលពីថ្ងៃទី២៦ ខែតុលា ឆ្នាំ២០១៦កន្លងទៅ តុលាការធ្វើការសាកសួរដេញដោលតែលើកម្លាំងសមត្ថកិច្ចដើម្បីដាក់បន្ទុកលើជនជាប់ចោទ ខណ:លោក ហុង សុខហួរ បានស្នើឱ្យតុលាការអញ្ជើញអ្នកជំនាញអំពី សន្ធិសញ្ញា មកពន្យល់អង្គសវនាការ ដើម្បីបង្ហាញនៅការពិត។
ដោយឡែកក្រុមមេធាវីការពារសិទ្ធិឱ្យលោក ហុង សុខហួរ បានថ្លែងសន្និដ្ឋានថា តំណាងអយ្យការបានចោទប្រកាន់កូនក្តីរបស់ពួកគេដោយគ្មានមូលដ្ឋានច្បាប់ និងគ្មានភស្តុតាងគ្រប់គ្រាន់នោះទេ ខណ:ដែលតំណាងអយ្យការនៅតែតំកល់ការចោទប្រកាន់ដូចដើម។

គួររំលឹកថា លោក ហុង សុខហួរ ត្រូវបានកម្លាំងសមត្ថកិច្ចឃាត់ខ្លួន កាលពីព្រឹក ថ្ងៃទី១៥ ខែសីហា ឆ្នាំ២០១៥ នៅផ្ទះ របស់លោក យន្ត ថារ៉ូ អ្នកតំណាងរាស្ត្រ មណ្ឌលខេត្តបន្ទាយមានជ័យ របស់ គណបក្សសង្គ្រោះជាតិ នៅក្នុងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ។ ក្រោយមកលោក ហុង សុខហួរ ត្រូវបានកម្លាំងសមត្ថកិច្ច បញ្ជូនខ្លួន ទៅតុលាការនៅរសៀលថ្ងៃដដែលដើម្បីបន្តនីតិវិធី៕

មតិយោបល់