ព្រៃវែងៈ ក្មេងស្រី ២ នាក់ ដើរទៅជីកក្ដាមនៅវាលស្រែ ពេលចុះលាងជើងក្នុងទឹកស្រះក៏បាក់ដីមាត់ស្រះលង់ទឹក បណ្ដាលឱ្យលង់ស្លាប់២នាក់ ។

នៅវេលាម៉ោង ១៤ និង១៥នាទី ថ្ងៃទី០១ ខែឧសភា ឆ្នាំ២០១៦ នៅចំណុច ភូមិព្រៃជ្រាំង ឃុំពានរោង ស្រុកស្វាយអន្ទរ មានករណីលង់ទឹក​បណ្តាលឲ្យ​ស្លាប់ក្មេងស្រីចំនួន ០២ នាក់ ។

មន្ត្រីនគរបាលខេត្តព្រៃវែងឲ្យដឹងថា នៅវេលាម៉ោង ១៤ និង ១៥ នាទីថ្ងៃទី ០១ ខែ ឧសភា ឆ្នាំ២០១៦ មានឈ្មោះ ហាន គន្ធា ស្រី អាយុ ១៤ ឆ្នាំ មានទីលំនៅ ភូមិព្រៃជ្រាំង ឃុំពានរោង ស្រុកស្វាយអន្ទរ និង ឈ្មោះ អាន វណ្ណលីដា ស្រី អាយុ ១៥ ឆ្នាំ ភូមិព្រៃជ្រាំង ឃុំពានរោង ស្រុកស្វាយអន្ទរ បានបបួលគ្នាទៅចាប់កង្កែប ក្តាម នៅវាលស្រែ ហើយជើងប្រឡាក់ដី រួចចុះលាងជើងនៅមាត់ស្រះ ស្រាប់តែបាក់ដីនៅមាត់ស្រះ បណ្តាលឲ្យធ្លាក់ចូលទឹកស្រះ បន្ទាប់មកមិត្តភក្តិដែលទៅជាមួយ ឃើញដូច្នេះក៏នាំគ្នាចុះជួយ បណ្តាលឱ្យលង់ទឹក (ស្លាប់) ទាំងអស់គ្នាតែម្តង ។

ក្រោយពេលកើតហេតុ មន្ត្រីនគរបាលបានចុះទៅដល់កន្លែងកើតហេតុ ធ្វើការត្រួតពិនិត និងធ្វើកោសល្យវិច័យលើសាកសពបានបញ្ជក់ថា អ្នកទាំងពីរពិតជាបានបាត់បង់ជីវិត ដោយសារលង់ទឹកពិតប្រាកដមែន ។

បច្ចុប្បន្នសពក្មេងស្រីទាំង ២ នាក់ ត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕