សៀមរាបៈ រថយន្តដឹកអ្នកដំណើររបស់ក្រុមហ៊ុនឡារីតា១គ្រឿង បានបោះពួយក្នុងល្បឿនលឿន ក៏ជ្រុលទៅបុកម៉ូតូ១គ្រឿង បណ្តាលឲ្យជនរងគ្រោះបាក់ដៃ និងបាក់ជើងខាងឆ្វេង ខណៈកំពុងជិះឆ្លងផ្លូវ កាលពីវេលាម៉ោង១និង៤៥នាទី ថ្ងៃទី១៥ ខែវិច្ឆិកា ឆ្នាំ២០១៦ នៅលើកំណាត់ផ្លូវជាតិលេខ៦ ត្រង់ចំណុចមុខវិទ្យាល័យកំពង់ក្តី ស្ថិតក្នុងភូមិពោធិសិរី ឃុំកំពង់ក្តី ស្រុកជីក្រែង ខេត្តសៀមរាប។

លោកវរសេនីយ៍ត្រី សុខ សុទ្ធាវុធ អធិការនគរបាលស្រុកជីក្រែង បានឲ្យដឹងថា រថយន្តដែលបុកម៉ូតូជនរងគ្រោះ គឺជារថយន្តដឹកអ្នកដំណើររបស់ក្រុមហ៊ុនឡារីតា ពណ៌ទឹកប្រាក់ ពាក់ស្លាកលេខ ភ្នំពេញ2AD-4401 បើកបរពីលិចទៅកើត លុះដល់ចំណុចកើតហេតុ បានបុកជាមួយម៉ូតូជនងរងគ្រោះម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ1AD-1950 ដែលជិះឆ្លងផ្លូវជាតិលេខ៦ ពីត្បូងទៅជើងតែម្នាក់ឯង បណ្ដាលឲ្យរងរបួសធ្ងន់ ដោយបាក់ដៃ និងបាក់ជើងខាងឆ្វេង ហើយត្រូវបានដឹកយកទៅជួយសង្គ្រោះភ្លាមៗ។

លោក បានបន្តទៀតថា ក្រោយពេលកើតហេតុភ្លាមៗសមត្ថកិច្ចនគរបាល បានធ្វើការឃាត់ខ្លួន ឈ្មោះ ស៊ឹម រដ្ឋា ភេទប្រុស អាយុ៣១ឆ្នាំ រស់នៅភូមិសុណនថៃ ឃុំត្រាំស្វាយ ស្រុកព្រះស្តេច ខេត្តព្រៃវែង ដែលជាអ្នកបើកបរ នាំមកធ្វើការសាកសួរនៅអធិការដ្ឋាននគរបាលស្រុក និងបញ្ជូនទៅកាន់ការិយាល័យនគរបាលចរាចរណ៍នៃស្នងការដ្ឋាននគរបាលខេត្តសៀមរាប នៅព្រឹកថ្ងៃទី១៦ ខែវិច្ឆិកា ឆ្នាំ២០១៦ ដើម្បីធ្វើការសាកសួរបន្តតាមនីតិវិធីច្បាប់។ ចំណែក ជនរងគ្រោះ ឈ្មោះ លន់ ហេងឡុង ភេទប្រុស អាយុ១៤ឆ្នាំ រស់នៅភូមិឃុំកើតហេតុខាងលើ កំពុងសម្រាកព្យាបាលនៅមន្ទីរពេទ្យគន្ធបុប្ផានៅឡើយ។

គួរកត់សម្គាល់ផងដែរថា ក្រុមហ៊ុនដឹកអ្នកដំណើរយីហោឈ្មោះ”ឡារីតា” នេះ ត្រូវបានគេដឹងថាមានករណីគ្រោះថ្នាក់ចរាចរណ៍ច្រើនជាងគេ ហើយអ្នកខ្លះថាបណ្តាលមកពីបើកបរក្នុងល្បឿនលឿនៗពេក។

បច្ចុប្បន្ន រថយន្តនិងម៉ូតូ ត្រូវបានយកមករក្សាទុកនៅអធិការដ្ឋាននគរបាលស្រុកជីក្រែងរង់ចាំការដោះស្រាយជាក្រោយ៕