ភ្នំពេញៈ យោងតាមការបញ្ជាក់របស់លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ បានឱ្យដឹងថា រហូតមកដល់រសៀលថ្ងៃទី១៦ ខែវិច្ឆិកា ឆ្នាំ២០១៦ នេះតុលាការនៅមិនទាន់បានបន្តនីតិវិធីស៊ើបសួរលើជនត្រូវចោទឈ្មោះ ម៉ាក មុនីរ័ត្ន ភេទប្រុស អាយុ ៣៤ឆ្នាំ មុខរបរ ប្រធានគណនេយ្យក្រុមហ៊ុន មីត ស៊ី អូ អេស ខេ ឡាញ ដឹកអ្នកដំណើរ នៅឡើយទេ ដោយសារតែដល់ពេលសម្រាកទៅហើយ ដូច្នេះរងចាំបន្តនៅថ្ងៃស្អែក ទើបដឹងថា លោកចៅក្រមស៊ើបសួររូបណាជាអ្នកកាន់សំណុំរឿងនេះ។

អ្នកនាំពាក្យដដែលបានបន្តថា ជនត្រូវចោទឈ្មោះ ម៉ាក មុនីរ័ត្ន ត្រូវបានលោក ហ៊ឹង ប៊ុនថន តំណាងអយ្យការចោទប្រកាន់៣បទចោទគឺទី១ ពីបទ រំលោភលើទំនុកចិត្ត ទី២បទ ក្លែងបន្លំឯកសារ និងទី៣បទ ប្រើប្រាស់លិខិតក្លែង យោងតាមមាត្រា ៣៩១ មាត្រា ៣៩២ មាត្រា ៦២៦ មាត្រា ៦២៧ និងមាត្រា ៦២៨ នៃក្រមព្រហ្មទណ្ឌ។

សូមបញ្ជាក់ថា ចំពោះរថយន្តម៉ាក អូឌី សេរី២០០៨ ពាក់ស្លាកលេខ ភ្នំពេញ 2AD-1789 នៅរសៀលថ្ងៃទី១៦ ខែវិច្ឆិកា ឆ្នាំ២០១៦នេះត្រូវបានលោក ហ៊ឹង ប៊ុនថន តំណាងអយ្យការប្រគល់ទៅឱ្យឈ្មោះ រឹម រីណា ភេទស្រី អាយុ ៣៦ឆ្នាំ ជាប្រពន្ធ ជនត្រូវចោទឈ្មោះ ម៉ាក មុនីរ័ត្ន រស់នៅផ្ទះលេខ៥ ភូមិទួលគោក សង្កាត់ទួលសង្កែ ខណ្ឌឬស្សីកែវ រក្សាទុកជាបណ្ដោះអាសន្នសិន។

គួររំលឹកថា ជនត្រូវចោទ ម៉ាក មុនីរ័ត្ន រស់នៅផ្ទះលេខ៥ ភូមិទួលគោក សង្កាត់ទួលសង្កែ ខណ្ឌឬស្សីកែវ ត្រូវបានសមត្ថកិច្ចនាយកដ្ឋានព្រហ្មទណ្ឌក្រសួងមហាផ្ទៃ ឃាត់ខ្លួនកាលពីព្រឹកថ្ងៃទី១៥ ខែវិច្ឆិកា ឆ្នាំ២០១៦ ម្សិលមិញ រួចបញ្ជូនមកឱ្យលោក ហ៊ឹង ប៊ុនថន តំណាងអយ្យការអមសាលាដំបូងរាជធានីភ្នំពេញសាកសួរបន្តតាមនីតិវិធី៕

https://youtu.be/Y-vqHJMLWCk