ភ្នំពេញ: នគរបាលនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ដឹកនាំកម្លាំងចុះត្រួតពិនិត្យការស្នាក់នៅរបស់ជនបរទេសតាមបណ្តាហាងកាហ្វេ ឃាត់ខ្លួនបានជនជាតិវៀតណាមខុសច្បាប់ចំនួន២០នាក់ យកមកធ្វើការសាកសួរ។ ការចុះបង្ក្រាបនេះបានធ្វើឡើងកាលពីរសៀលថ្ងៃទី២២ ខែវិច្ឆិកា ឆ្នាំ២០១៦ ស្ថិតនៅចំណុចតាមបណ្តាហាងកាហ្វេ ផ្លូវ៣៦៩ ភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ។

ការបង្ក្រាបនេះដែរ ធ្វើឡើងដោយមានការដឹកនាំកម្លាំងដោយ លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ។ ជាក់ស្តែងនៅក្នុងការបង្ក្រាបនេះដែរ សមត្ថកិច្ចធ្វើការឃាត់ខ្លួនបានជនជាតិវៀតណាមចំនួន២០នាក់ ក្នុងនោះមានស្រីម្នាក់ ក្រោយពីរកឃើញថា ជនបរទេសទាំង២០នាក់ខាងលើនេះ បានលួចឆ្លងដែនខុសច្បាប់ចូលមកស្នាក់នៅនិងប្រកបការងារក្នុងប្រទេសកម្ពុជាដោយខុសច្បាប់ ។

បច្ចុប្បន្ន ជនបរទេសទាំង២០នាក់ ត្រូវបានសមត្ថកិច្ចនាំខ្លួនមកកាន់ អគ្គនាយកដ្ឋានអន្តោប្រវេសន៍ក្រសួងមហាផ្ទៃ ដើម្បីត្រៀមបណ្តេញចេញនៅពេលក្រោយតាមនីតិវិធីច្បាប់៕