បន្ទាយមានជ័យ៖ គ្លីនិកមួយឈ្មោះ សែនសុខសាន្ត ដែលមានទីតាំងជាប់ដងផ្លូវជាតិលេខ៥ ស្ថិតក្នុងភូមិគីឡូម៉ែតលេខ៤ សង្កាត់ផ្សារកណ្តាល ក្រុងប៉ោយប៉ែត ត្រូវក្រុមគ្រួសារជនរងគ្រោះម្នាក់ប្តឹងថាបានព្យាបាលខុសបច្ចេកទេស ធ្វើឱ្យមនុស្សស្លាប់។
ជនរងគ្រោះ ដែលបានបាត់បង់ជីវិត ឈ្មោះ ម៉ា សុធា អាយុ២៤ឆ្នាំ មានទីលំនៅភូមិកូនដំរី សង្កាត់និមិត្ត ក្រុងប៉ោយប៉ែត មុខរបរលក់ដូរនៅអាងអូរខៃដន ក្នុងភូមិកូនដំរី ។
ជនរងគ្រោះ ត្រូវពស់វែកក្របីចឹក កាលពីវេលាម៉ោងជាង២រសៀល ថ្ងៃទី១៧ ខែធ្នូ ឆ្នាំ២០១៦ ត្រូវសាច់ញាតិដឹកទៅ កាន់គ្លីនិកឯកខាងលើ ដើម្បីសង្គ្រោះបន្ទាន់ ។
ម្ចាស់គ្លីនិក ព្រោះតែស្រែកឃ្លាន ចង់បានលុយ ពីជនរងគ្រោះពេក មិនព្រមបញ្ជូនជនរងគ្រោះ ទៅមន្ទីពេទ្យរដ្ឋឡើយ ដោយធ្វើការព្យួរ សេរ៉ូមអស់ចំនួនពីរកំប្លោក ធ្វើឱ្យពឹសពស់ ជ្រាបដល់បេះដូង ក៏ស្លាប់នៅក្នុងគ្លីនិកនោះតែម្តងទៅ នៅវេលា ម៉ោងប្រហែល១០នាទីយប់ថ្ងៃទី១៧ ខែឆ្នូឆ្នាំ២០១៦។
ម្ចាស់គ្លីនិកដែលធ្វើឱ្យមនុស្សស្លាប់ មានឈ្មោះ ឈុំ ប៊ុនឆេង ។តាមច្បាប់របស់ក្រសួង សុខាភិបាល ចំពោះជំងឺពស់ចឹក ក្រសួងសុខាភិបាល បានហាម មិនអនុញ្ញាតិ ឱ្យគ្លីនិក ឯកជន ណាមួយព្យាបាល ជាដាច់ខាត ប្រសិនជាមានករណីពស់ចឹកត្រូវបញ្ជូន អ្នកជម្ងឺទៅមន្ទីរដ្ឋ ដើម្បីសង្គ្រោះបន្ទាន់ ។ ប៉ុន្តែលោកឈុំ ប៊ុនឆេង ព្រោះតែចង់បានលុយពីអ្នកជម្ងឺខ្លាំងពេកហ៊ានព្យាបាលជម្ងឺពស់ចឹកទាំងប្រថុយប្រថានបំពានច្បាប់ក្រសួងសុខាភិបាលបណ្តាលឱ្យមនុស្សស្លាប់ទាំងវ័យក្មេងស្លាប់ចោលក្រុមគ្រួសារយ៉ាងអណោចអធ័ម៕
មតិយោបល់