FC Barcelona កំពុងតែទាក់ទងលោក Ronald Koeman មកដឹកនាំក្រុមជំនួស Luis Enrique នៅរដូវកាលថ្មីខាងមុខនេះ ក្រោយពីមានដំណឹងមកថាបុរសម្នាក់នេះនឹងចាកចេញក្រោយចប់រដូវកាលនេះ។
Koeman បច្ចុប្បន្នកំពុងដឹកនាំក្រុម Everton លេងនៅលីគកំពូលរបស់អង់គ្លេស ខណៈដែលបុរសសញ្ជាតិហុល្លង់រូបនេះក៏ធ្លាប់លេងនៅក្លឹប Barcelona ផងដែរក្នុងនាមជាខ្សែបម្រើការពារ ពោលគឺនៅឆ្នាំ១៩៩២ ជួយក្រុមឈ្នះពាន European Cup ។ យ៉ាងណាមិញ អ្នកចាត់ការរូបនេះក៏ធ្លាប់ធ្វើជាជំនួយការគ្រូបង្វឹកម្នាក់ដែរ នៅ Nou Camp ដោយគ្រានោះលោក Louis Van Gaal នៅដឹកនាំចន្លោះឆ្នាំ ១៩៩៨ដល់២០០០។
ដោយមើលឃើញពីភាពជិតស្និទ្ធនេះហើយ បានជាក្លឹប Barcelona មានបំណងចង់បានបុរសខាងលើមកដឹកនាំក្រុម នៅពេលដែលលោក Enrique អាចនឹងចាកចេញនៅរដូវក្ដៅខាងមុខ ឬលឿនជាងនេះ ប្រសិនបើមិនអាចជួយក្រុមរកឃើញជ័យជម្នះនិងពានរង្វាន់បានទេនោះ។
FC Barcelona បច្ចុប្បន្ននេះស្ថិតនៅលេខរៀងទី២ក្នុងតារាង La Liga ដោយចាញ់ពិន្ទុក្រុម Real Madrid ខណៈដែលពាន Copa del Rey និង Champions League ពួកគេក៏មិនទាន់ធ្លាក់ចេញនោះដែរ៕
មតិយោបល់