ក្លឹប Chelsea កំពុងតែចែវចូវយកខ្សែបម្រើប្រយុទ្ធ Yannick Carrasco ពីក្លឹប Atletico Madrid ដើម្បីជាការរៀបជើងព្រួលនៅពេលដែល Diego Costa ចាកចេញពី Chelsea ទៅ។

មួយរយ:មកនេះ ខ្សែប្រយុទ្ធ Costa ហាក់ដូចជាមានរឿងរ៉ាវច្រើនណាស់ជាមួយក្រុម Chelsea ដោយបានខកខានការប្រកួតកន្លងមក ព្រោះតែមានបញ្ហាផ្ទៃក្នុងជាមួយក្រុម ក៏ដូចជាអ្នកចាត់ការ Conte ផ្ទាល់តែម្ដង។ ដូចគ្នានេះដែរ ម្សិលមិញនេះមានដំណឹងមួយបានចេញមកថា រឿងរ៉ាវនោះបានស្ងប់ទៅវិញហើយ ដោយកីឡាករ Costa ផ្ទាល់ក៏ព្រមមកហ្វឹកហាត់ជាមួយក្រុម ហើយរំពឹងថាបានចូលលេងទៀតផងក្នុងការប្រកួតចុងសប្ដាហ៍នេះ។

បើទោះជាស្ថានការណ៍ស្ងប់ស្ងាត់មែន ប៉ុន្តែក្រុម Chelsea ផ្ទាល់ក៏បានត្រៀមជើងព្រួលទុកសម្រាប់ជំនួស Costa ហើយដែរ ដោយពួកគេព្យាយាមទិញកីឡាករ Carrasco ពីក្លឹប Atletico Madrid ក្រោយពីឃើញទម្រង់លេងរបស់ខ្សែប្រយុទ្ធរូបនេះល្អទាំងនៅក្លឹបនិងជម្រើសជាតិ។

ដោយការចង់បានកីឡាករវ័យ២៣ឆ្នាំនេះ Chelsea មានគម្រោងនាំយកនៅរដូវក្ដៅខាងមុខ ជាមួយការប្រជែងនិងក្លឹបធំៗផ្សេងទៀតដូចជា Juventus និង Bayern Munich ជាដើម ព្រោះពួកគេក៏ចាប់អារម្មណ៍ដែរ៕