Sergio Busquets ខ្សែបម្រើសំខាន់របស់ FC Barcelona បានរងរបួសអំឡុងពេលប្រកួតជាមួយ Eibar កាលពីពេលកន្លងទៅនេះ ដោយក្រុមគ្រូពេទ្យមិនទាន់អាចកំណត់ពេលព្យាបាលប៉ុន្មាននោះទេ។
កីឡាករវ័យ២៨ឆ្នាំរូបនេះ ចូលលេងបានត្រឹមតែ៨នាទីប៉ុណ្ណោះក៏ត្រូវប្ដូរចេញក្រោយពីប៉ះគ្នាជាមួយ Gonzalo Escalante បណ្ដាលឱ្យដាច់សរសៃពួរជើងធ្ងន់ធ្ងរ។ ចំពោះរយៈពេលដែលត្រូវព្យាបាលវិញនៅមិនទាន់អាចកំណត់បាននៅឡើយ ដោយត្រូវរង់ចាំមួយរយៈទៀតសិន។ ប៉ុន្តែអ្វីដែលច្បាស់នោះ គឺកីឡាករឆ្នើមរូបនេះមិនអាចចូលលេងបានទេ ពេលប៉ះជាមួយ Real Sociedad ក្នុងពានរង្វាន់ Copa del Rey នៅពាក់កណ្ដាលសប្ដាហ៍នេះ។
ដូចគ្នានេះដែរ លោក Luis Enrique អ្នកចាត់ការក្រុម Barcelona រំពឹងថា Busquets នឹងចូលលេងបានវិញនៅប្រកួតទល់នឹង PSG ក្នុងពានរង្វាន់ UEFA Champions League ត្បិតអីនោះជាប្រកួតសំខាន់មែនទែនសម្រាប់ក្រុម។ មួយវិញទៀត សម្រាប់ការអវត្តមានរបស់ខ្សែបម្រើខាងលើនេះដែរ អ្នកចាត់ការរូបនេះបានបង្ហើបឱ្យដឹងថាមានកីឡាករ៣នាក់អាចលេងជំនួសតំណែងនេះបានគឺ Sergi Roberto, Ivan Rakitic និង Javier Mascherano ៕
មតិយោបល់