Post News Media ព័ត៌មានកីឡា លីគ​នៅ​ចិន ​ឱ...

លីគ​នៅ​ចិន ​ឱ្យ Wenger ​៣០​លាន​ផោន​ក្នុង​១​ឆ្នាំ​ ​ប៉ុន្តែ​លុយ​មិន​អាច​ទិញ​ទឹក​ចិត្ត​បាន

Arsene Wenger ​ដែល​នឹង​ផុត​កុងត្រា​ជាមួយ Arsenal ​នៅ​រដូវ​ក្ដៅ​ខាង​មុខ ​ត្រូវ​បាន​ក្លឹប​ជា​ច្រើន​កំពុង​តែ​ដាក់​សំណើ​ឱ្យ​លោក​ទៅ​ដឹក​នាំ ​ដោយ​ក្នុង​នោះ​ក៏​មាន​ក្លឹប​នៅ​ប្រទេស​ចិន​មួយ​ចំនួន​ផង​ដែរ។

បើ​តាម​ការ​ប្រភព​ពី​ប្រទេស​ចិន​មក ​អ្នក​ចាត់ការ​រូប​នេះ​បាន​បដិសេធ​សំណើ​ធំ​មួយ​ពី​ក្លឹប​នៅ​ចិន ពោល​គឺ​ទឹក​ប្រាក់​៣០​លាន​ផោន​ក្នុង​មួយ​ឆ្នាំ ប៉ុន្តែ​លោក Wenger ​មិន​ព្រម​ទៅ​ដឹក​នាំ​ទេ។ ខណ:​ដែល​បុរស​វ័យ​៦៧​ឆ្នាំ​រូប​នេះ ​ចង់​បន្ដ​នៅ​តំបន់​អឺរ៉ុប ​មិន​ចង់​ទៅ​ដឹក​នាំ​ក្រុម​នៅ​អាស៊ី​ឡើយ បើ​ទោះ​ជា​ទទួល​បាន​ប្រាក់​ឈ្នួល​ច្រើន​លើសលប់​យ៉ាង​ណា​ក៏​ដោយ។

តា​បារាំង ​កំពុង​ដឹក​នាំ​ក្រុម Arsenal ​នេះ ទទួល​បាន​តែ​៨​លាន​ផោន​ប៉ុណ្ណោះ​ក្នុង​១​ឆ្នាំ ​ត្បិត​អី​ប្រាក់​តម្លៃ​ឈ្នួល​នេះ​ទាប​ខ្លាំង​មែនទែន ​បើ​ធៀប​ទៅ​នឹង​សំណើ​របស់​ក្លឹប​នៅ​ចិន។ យ៉ាងណាមិញ ​លោក Wenger ​ធ្លាប់​បាន​បញ្ជាក់​ថា​អាជីព​ដឹក​នាំ​ក្រុម​បាល់ទាត់​របស់​លោក​គឺ​កើត​ចេញ​ពី​ចិត្ត ​មិន​មែន​ដើម្បី​ទទួល​បាន​ប្រាក់​ឈ្នួល​ច្រើន​នោះ​ទេ។

ចំពោះ​អនាគត​របស់​លោក​វិញ ​ក្លឹប Arsenal ​នៅ​មិន​ទាន់​ប្រកាស​ថា​បន្ដ​ឬ​យ៉ាង​ណា​នោះ​ទេ បើ​ទោះ​ជា​វា​នឹង​ផុត​កុងត្រា​នៅ​រដូវ​ក្ដៅ​ខាង​មុខ​នេះ​ក៏​ដោយ៕